Treinamentu Atis Bo’ot ba Juventude Sira iha Área Soru Hena Sei Remata iha Dezembru

Covalima (RCCT) 18 Novembru 2026 – Treinamentu Atis Bo’ot ba Soru Na’in Foinsa’e sira iha Munisípiu Covalima ne’ebé hahú ona forsamsaun ba Foinsa’e sira iha loron 16 fulan Juñu 2026, sei remata iha fulan Dezembru tinan ne’e.

Treinamentu ne’e hetan apoiu husi Timor Aid no Gabinete Apoiu Sociedade Sivil (GASC), ho objetivu prinsipál atu dezenvolve abilidade no koñesimentu juventude sira nian, hodi kontinua preserva no dezenvolve identidade kulturál tradisionál Timor-Leste, liuliu iha área soru tais, soru hena no arte tradisionál seluk.

Treinadóra treinamentu ne’e, Meliana Barros de Lima, informa katak durante prosesu formasaun ne’e, hamutuk ho formandu sira, konsege produz ona hena hamutuk 10, ho kada hena ida nia naruk metru 7.

Nia hatete katak formasaun ne’e sei remata iha fulan Dezembru tinan ne’e, no formandu sira ne’ebé partisipa ativu durante prosesu formasaun sei simu sertifikadu.

“Hena hamutuk lima ona, no kada hena ida nia naruk metru 7. Hena lima ne’e sira lori ona ba Dili, no agora sei falta tan hena lima iha ne’e. Bainhira ami hotu remata soru ona, Timor Aid sei lori hena sira ne’e ba rai iha eskritóriu Timor Aid iha Dili, tanba sei hatudu ba públiku nasionál katak rezultadu husi treinamentu ne’ebé ami hala’o mak ida-ne’e,” Meliana Barros de Lima informa.

Iha parte seluk, formanda Sança Odete de Jesus hato’o nia orgullu no agradese ba Timor Aid tanba fó oportunidade ba nia atu aprende no dezenvolve kapasidade iha arte soru hena.

Nia hatete katak durante treinamentu ne’e, formandu sira hetan aprendizajen ho di’ak, hahú husi etapa dahuluk to’o etapa ikus. Nia mos afirma katak, bainhira treinamentu remata, se la hetan oportunidade atu kontinua aprende iha programa seluk, nia sei kontinua pratika no aprende iha uma.

“Ha’u sente orgullu tanba iha ne’e treinadór sira hanorin ho di’ak, ami mos aprende ho di’ak no komprende lalais. Durante ami aprende, hahú husi etapa dahuluk, segundu hili nanun, terseiru mak soru. Iha futuru, se Timor Aid bolu fali ha’u, ha’u sei kontinua aprende. Se la bolu, ha’u sei kontinua aprende iha uma,” Sança Odete de Jesus informa.

Formasaun ne’e envolve formanda feto na’in 8, kompostu husi Suku Suai Loro na’in 5, no Suku Debos na’in 3.

Atividade formasaun hala’o durante loron lima kada semana, hahú husi Segunda-Feira to’o Sexta-Feira.

Sentru formasaun lokaliza iha Aldeia Tabakolot, Suku Debos, Postu Administrativu Suai, Munisípiu Covalima.

Jornalista: J. Correia
Editor: Paul Mandeu

 

Array