CBRN-TL Kapasita Feto ho Defisiénsia no Feto Vulnerável Kona-ba Prevensaun no Resposta ba Violénsia Bazeia ba Jéneru iha Covalima

Covalima (RCCT), 18 Novembru 2026 – Community Based Rehabilitation Network Timor-Leste (CBRN-TL) kontinua fó formasaun ba feto ho defisiénsia no feto vulnerável kona-ba prevensaun no resposta ba violénsia bazeia ba jéneru (VBJ), ho objetivu atu aumenta koñesimentu no kapasidade komunidade iha Munisípiu Covalima.

Formadora CBRN-TL, Petronela Xavier, esplika katak formasaun ne’e foka liu ba feto ho defisiénsia, sobrevivente violénsia no joven feto sira ne’ebé vulnerável, inklui husi Suku Debos no Suku Holpilat.

“Organizasaun CBRN-TL halo formasaun ida-ne’e durante loron tolu ba feto ho defisiénsia, maluk LGBTI no sobrevivente, inklui joven feto sira ne’ebé vulnerável husi Suku Debos no Suku Holpilat. Objetivu mak atu kapasita sira kona-ba oinsá atu halo prevensaun ba violénsia bazeia ba jéneru ne’ebé bele akontese iha família no komunidade,” Petronela hateten.

Nia hatutan katak, durante formasaun, partisipante sira aprende kona-ba defisiénsia, igualdade jéneru, prevensaun violénsia bazeia ba jéneru no oinsá atu garante seguransa ba feto sira, liuliu ba joven sira, atu bele sai ajente mudansa iha prevensaun violénsia iha família no komunidade.

“Durante loron tolu, maluk feto sira sei aprende kona-ba defisiénsia, igualdade jéneru no prevensaun violénsia bazeia ba jéneru. Ami foka liu ba feto sobrevivente, feto ho defisiénsia no maluk LGBTI, tanba ami hatene katak feto barak hasoru violénsia no dala barak nonook,” nia esplika.

Petronela mós afirma katak formasaun ne’e importante atu fó espasu ba partisipante sira, liuliu feto ho defisiénsia, atu bele koalia kona-ba esperiénsia no sentimentu sira ne’ebé hasoru iha moris lorloron.

Segundo nia, violénsia ne’ebé feto sira hasoru bele inklui violénsia fízika, psikolojika, seksuál no ekonómika, ne’ebé bele akontese iha família, komunidade no sosiedade.

Enkuantu ne’e, partisipante Febriana Felicia Seran hateten katak nia sente kontente no orgullu tanba hetan oportunidade atu partisipa iha formasaun CBRN-TL.

“Hau hanesan feto ho defisiénsia ida ne’ebé durante ne’e la hetan oportunidade barak. Hau sente kontente tanba hau hetan informasaun ne’ebé di’ak. Hau hakarak buka fatin hanesan ho feto maluk sira no hetan oportunidade hanesan kolega sira seluk,” Febriana hateten.

Nia mós hateten katak formasaun ne’e fó motivasaun ba nia atu kontinua buka koñesimentu no asesu ba informasaun ne’ebé di’ak liután, tanba antes ne’e nia sente katak oportunidade ba feto ho defisiénsia seidauk hanesan ho ema seluk.

Jornalista: Jefri Rastaky

Editor: Paul Madeu

Array