Autoridade Kovalima Apela Lideransa Komunitária Atu Mobiliza Sidadaun Atualiza Kartaun Eleitorál

Covalima (RCCT), 17 Novembru 2026-Reprezentante Prezidente Autoridade Munisípiu Kovalima, Filomeno Cardoso, apela ba lideransa administrasaun postu no xefe suku sira atu mobiliza komunidade hodi atualiza sira-nia Kartaun Eleitorál (KE) ba sistema biométriku, nu’udar preparasaun ba Eleisaun Prezidensiál 2027.

Apelu ne’e hato’o iha enkontru koordenasaun ne’ebé Komisaun Nasionál ba Eleisaun (CNE) organiza hamutuk ho Autoridade Munisípiu, lideransa postu administrativu, xefe suku no instituisaun relevante sira. Enkontru ne’e buka diskute no identifika solusaun hamutuk hodi enkoraja sidadaun eleitór sira halo rejistu no atualiza sira-nia Kartaun Eleitorál ba sistema biométriku.

Objetivu husi enkontru ne’e mak atu asegura katak sidadaun hotu-hotu iha asesu no oportunidade atu ejerse sira-nia direitu siviku no polítiku liuhusi partisipasaun iha Eleisaun Prezidensiál 2027.

Reprezentante Prezidente Autoridade Munisípiu Kovalima, Filomeno Cardoso, hateten katak Sekretaria Estadu Dezenvolvimentu Lokál, hamutuk ho Autoridade Munisípiu Kovalima, hala’o ona lansamentu Resensiamentu Eleitorál no Atualizasaun Dadus Biométriku (REABD) ba sidadaun sira, inklui sidadaun Timor-Leste ne’ebé hela iha estranjeiru.

“Ha’u hanoin atu husu ba ita hotu, liuliu autoridade postu no lideransa komunitária sira, atu halo esforsu hodi haruka sidadaun atualiza sira-nia Kartaun Eleitorál ba sistema biométriku. Tanba ne’e mak ita hotu halibur iha ne’e, inklui lideransa polítika no lideransa komunitária sira. REABD ne’e responsabilidade ita hotu nian. Se ita hakarak atinji kadeira 15 no iha tinan oin simu podér lokál, ita tenke priense ita-nia responsabilidade hodi atualiza KE ba sistema biométriku, atu fasilita sidadaun no orgaun eleitorál sira iha prosesu kontrolu,” dehan Filomeno Cardoso iha nia diskursu iha Salaun Domin CNE, Tabakolot, Kovalima.

Autoridade Munisípiu Kovalima hato’o apelu ne’e bazeia ba dadus Sekretariadu Tékniku Administrasaun Eleitorál (STAE), ne’ebé hatudu katak eleitór 42% de’it mak atualiza ona sira-nia Kartaun Eleitorál ba sistema biométriku, enkuantu 58% seidauk halo atualizasaun.

Nune’e, Autoridade Munisípiu husu lideransa partidu polítiku, autoridade postu administrativu no xefe suku sira atu kontinua mobiliza komunidade hodi atualiza sira-nia Kartaun Eleitorál.

Iha parte seluk, Diretora CNE Munisípiu Kovalima, Margarida dos Santos, esplika katak STAE hahú ona prosesu resensiamentu no atualizasaun dadus eleitorál iha postu administrativu sira.

“Bazeia ba ami-nia supervizaun, ami haree katak seidauk iha partisipasaun másima husi eleitór sira iha postu administrativu. Tanba ne’e, presiza ita hotu atu diskute oinsá mak bele rezolve problema ne’e,” nia dehan.

Margarida dos Santos subliña katak Eleisaun Prezidensiál sei realiza iha 2027, no eleitór sira sei uza Kartaun Eleitorál ho sistema biométriku. Tanba ne’e, nia husu entidade hotu-hotu atu kontribui hodi asegura katak sidadaun sira atualiza sira-nia kartaun molok eleisaun.

“Ita hotu nia kontribuisaun importante tebes. La’ós servisu CNE no STAE nian de’it, maibé ita hotu tenke servisu hamutuk hodi lori eleitór sira besik ba fatin REABD,” nia afirma.

Nia mós informa katak STAE iha ona planu atu estabelese atendimentu ba eleitór sira to’o iha nivel suku. Prosesu ne’e hahú ona iha Suku Kasabauk, ne’ebé eleitór sira hatudu entuziazmu atu halo atualizasaun Kartaun Eleitorál.

Tuir planu STAE, atendimentu ne’e sei kontinua to’o kobre suku 30 hotu ne’ebé tama iha Munisípiu Kovalima.

Tuir dadus STAE Munisípiu Kovalima, eleitór na’in 22.789 mak atualiza ona sira-nia Kartaun Eleitorál ba sistema biométriku, enkuantu eleitór na’in 28.680 seidauk halo atualizasaun, husi total eleitór na’in 54.558 iha munisípiu ne’e.

Jornalista: Jefry Rastaky
Editor: Paul Mandeu

Array