Eleitór na’in-28,680 iha Covalima seidauk atualiza dadus eleitorál

Covalima (RCCT), 16 Novembru 2026—Sekretariadu Tékniku Administrasaun Eleitorál (STAE) Munisípiu Covalima rejista katak eleitór na’in-28,680 seidauk halo Resensiamentu Eleitorál Apoiu ba Baze-dadus (REABD), maski prosesu rejistu foun no atualizasaun dadus eleitorál hala’o ona iha postu administrativu hotu.

Diretór STAE Munisípiu Covalima, João Tilman, informa dadus ne’e ba jornalista sira iha Kampung Baru. Nia hateten katak STAE estabelese ona ekipa téknika iha kada postu administrativu atu fasilita atendimentu ba eleitór sira ne’ebé hakarak rejistu ka atualiza sira-nia dadus eleitorál.

“Ami halo ona kolokasaun téknika STAE iha kada postu administrativu, ho alokasaun pesoál na’in-tolu, ne’ebé kompostu husi pontu vokál, operadór sistema no asistente operadór atu atende eleitór sira ne’ebé hakarak rejistu ka atualiza sira-nia dadus eleitorál,” João Tilman esplika.

Bazeia ba dadus STAE nian, total eleitór ne’ebé rejistu ona iha postu administrativu hitu hamutuk na’in-54,558. Husi total ne’e, eleitór na’in-3,199 mak rejistu foun, enkuantu na’in-22,789 mak atualiza ona sira-nia dadus eleitorál.

João Tilman hatutan katak, eleitór na’in-51,997 mak tama ona iha rejistu eleitorál antes prosesu REABD ne’e. Maski nune’e, to’o agora eleitór na’in-28,680 seidauk halo atualizasaun ba sira-nia dadus eleitorál.

Tanba ne’e, STAE Munisípiu Covalima prepara planu atu aumenta atendimentu liuhusi kolokasaun ekipa téknika iha nivel suku, hodi hakbesik servisu resensiamentu ba komunidade sira, nune’e sidadaun sira la presiza ba diretamente iha sede postu administrativu.

João Tilman esplika katak, númeru eleitór ne’ebé asesu atendimentu iha kada postu administrativu la hanesan iha loron ida-idak, tanba depende ba partisipasaun sidadaun sira.

“Prosesu atendimentu iha postu administrativu depende de’it ba sidadaun sira, tanba dala ruma iha loron ida atende eleitór na’in-20, maibé dala ruma la iha sidadaun ida mak mai. Nune’e, ami iha planu atu tun ba suku sira, tanba eleitór na’in-28,680 seidauk atualiza sira-nia dadus eleitorál,” nia dehan.

Nia mós husu komunidade sira atu aproveita oportunidade atendimentu ne’ebé STAE disponibiliza, hodi rejistu no atualiza sira-nia dadus eleitorál, atu garante katak informasaun eleitorál sira loos no atualizadu.

Antes ne’e, iha loron 7 Outubru 2026, Sekretáriu Estadu Dezenvolvimentu Lokál (SEDL), Mateus dos Santos Talo, hamutuk ho Autoridade Munisípiu Covalima, hala’o lansamentu atividade Resensiamentu Eleitorál Apoiu ba Baze-dadus (REABD) iha Postu Administrativu Tilomar.

Atividade ne’e iha objetivu atu hakbesik servisu resensiamentu eleitorál ba komunidade, hodi fasilita sidadaun sira atu rejistu no atualiza sira-nia dadus eleitorál.

Jornalista: J Correia

Editór: Paul Mandeu

Array