Covalima (RCCT), 11 Novembru 2026 — Projetu IkanAdapt ne’ebé implementa iha Postu Administrativu Tilomar, Zumalai no Suai, fó prioridade ba partisipasaun feto ho proporsaun 75% husi total membru grupu benefisiáriu, enkuantu mane reprezenta 25%.
Diretór Ezekutivu Centru Juventude Covalima, Julio Ferreira, informa katak projetu ne’e implementa iha suku tolu, mak Maudemo, Suai Loro no Tashilin, ho objetivu atu envolve komunidade, liuliu feto sira, iha prosesu dezenvolvimentu no implementasaun programa ne’ebé grupu benefisiáriu sira rasik propoin.
Julio Ferreira esplika katak Centru Juventude Covalima kontinua akompaña grupu benefisiáriu sira atu rekolla planu ne’ebé membru grupu sira elabora rasik, hodi diskute no determina programa prioridade ba implementasaun projetu.
“Dadaun ne’e, ami halo ona konfirmasaun no rekolla rezultadu husi diskusaun grupu sira-nian. Depois ne’e, ami sei halo avaliasaun ba rezultadu diskusaun kada grupu nian atu determina programa sira ne’ebé sei implementa. To’o agora, seidauk bele determina programa prioridade tanba prosesu diskusaun sei kontinua,” nia dehan.
Nia hatutan katak kada grupu iha membru na’in 10 resin, ne’ebé forma iha Postu Administrativu Tilomar, Suai no Zumalai.
Ferreira afirma katak projetu ne’e fó prioridade ba partisipasaun feto ho proporsaun 75%, enkuantu mane reprezenta 25%, ho mane na’in ida ka rua iha kada grupu.
Ho prioridade ne’e, Centru Juventude Covalima hein katak feto sira bele partisipa ativu iha prosesu diskusaun, planeamentu no implementasaun programa sira ne’ebé sei hili nu’udar prioridade iha Projetu IkanAdapt.
Projetu IkanAdapt ne’e implementa husi Centru Juventude Covalima ho apoiu finanseiru husi WorldFish, ho orsamentu hamutuk US$ 16.000 no durasaun implementasaun durante fulan neen.
Projetu ne’e nia objetivu mak atu aumenta partisipasaun juventude feto no mane ho idade entre tinan 17 to’o 35 iha setór peska, liuliu iha komunidade kosteira ne’ebé nia moris depende ba rekursu tasi nian.
Jornalista: J Correia
Editor: Paul Mandeu
