Covalima (RCCT), 11 Novembru 2026 — Manuel Barbosa Pina, ne’ebé konhese ho naran “Mameran” no nu’udar sobrevivente Masakre Santa Cruz, husu ba juventude sira atu hadomi malu, hametin unidade no kontribui ba dezenvolvimentu nasaun nian.
Nia husu juventude sira atu la uza grupu arte marsiais nu’udar razaun atu haketak malu, tanba, tuir nia, dezenvolvimentu nasaun presiza juventude sira nia unidade, paz no dame.
Manuel Barbosa hato’o mensajen ne’e iha nia palestra nu’udar oradór iha atividade Selebrasaun Loron Nasional Juventude ba dala XXI no Komemorasaun Masakre Santa Cruz ba dala XXXV, ne’ebé realiza iha Postu Administrativu Tilomar, Munisípiu Covalima.
“Ha’u husu ba juventude sira, liu-liu ba ha’u nia oan sira no ha’u nia alin sira ki’ik, atu hametin imi nia unidade ho paz no dame. Tanba uluk ami hadomi malu no la haree ba grupu arte marsiais. Ami hadomi malu ho prinsipiu ida de’it: oinsá mak rai ida ne’e bele ukun aan,” nia hateten.
Sobrevivente Masakre Santa Cruz ne’e mos relata katak luta no sacrifísiu ne’ebé sira dedika iha pasadu atu hetan ukun-rasik-an, ohin loron sai responsabilidade ba juventude sira atu kuidadu no dezenvolve rai ne’e.
Nia husu juventude atu uza sira nia matenek, abilidade no unidade hodi kontribui ba dezenvolvimentu Timor-Leste.
“Luta ida ne’ebé ami dedika ami nia aan hodi ukun aan, ohin ami oferese ba imi, joven sira. Kuidadu rai ne’e ho imi nia matenek no unidade,” nia hateten.
Jornalista: Paul Mandeu
