Covalima (RCCT), 09 Novembru 2026 — Trator agríkola nu’udar ekipamentu importante ida ne’ebé ajuda fasilita servisu komunidade agrikultór sira, hodi aumenta produsaun no rendimentu família, ne’ebé kontribui ba dezenvolvimentu setór agríkola iha nasaun.
Maibé, komunidade iha Postu Administrativu Tilomar, Munisípiu Covalima, enfrenta problema tanba trator agríkola hamutuk haat ne’ebé disponivel iha área ne’e, trator tolu la funsiona ho di’ak tanba ekipamentu balu estraga, ne’ebé dificulta komunidade nia atividade agríkola.
Xefe Aldeia Sadahur, Mario Amaral, informa ba jornalista sira katak trator agríkola iha Postu Administrativu Tilomar hamutuk haat, maibé trator tolu la funsiona ho di’ak, liuliu ekipamentu atu lori fila rai. Tanba ne’e, nia husu Ministériu Agrikultura atu fó atensaun ba problema ne’e, liuhusi manutensaun no hadi’a ekipamentu trator sira.
“Trator ba ita nia komunidade iha Tilomar, trator iha haat, maibé nia ekipamentu atu lori fila rai mak la di’ak hotu. Tanba ne’e, ami husu Diretór Agrikultura atu bele halo manutensaun ka haree fali ami nia trator iha Tilomar,” informa Mario Amaral.
Iha parte seluk, Diretór Servisu Munisipál Agrikultura Munisípiu Covalima, Lino Magno, informa katak Munisípiu Covalima iha trator hamutuk 27, maibé balu iha ona kondisaun la normal tanba ekipamentu sira estraga. Nia hatete katak iha Postu Administrativu Tilomar rasik iha trator haat, maibé ekipamentu balu estraga ona. Tanba ne’e, nia sei hato’o relatóriu ba Diresaun Nasionál no Ministériu Agrikultura, atu buka solusaun hodi hadi’a ekipamentu sira ne’e, nune’e trator sira bele kontinua fó servisu ba komunidade no grupu agrikultór sira.
“Trator iha ne’e hamutuk 27, maibé balu mak iha kondisaun la normal ona. Iha Postu Tilomar rasik, ha’u deskobre katak trator haat mak iha, maibé ekipamentu balu estraga ona. Ha’u sei halo relatóriu ba Diresaun Nasionál atu hadi’a ekipamentu sira, para servisu nafatin ba komunidade no grupu agrikultór sira hodi hasa’e produsaun. Semana oin ha’u sei hato’o relatóriu ne’e ba Ministru, atu bele hamutuk ho ekipa téknika munisipál no nasionál hodi hadi’a trator sira ne’e,” esplika Lino Magno.
Tuir informasaun ne’ebé hetan, ekipamentu ba trator boot hamutuk lima (5), ne’ebé agora daudaun iha Servisu Munisipál Agrikultura Munisípiu Manatutu, sei lori mai Munisípiu Covalima iha tempu badak.
Jornalista: J. Correia
Editor: Paul Mandeu
