Covalima (RCCT) 20-05-23, Sekretariadu Tekniku Administrasaun Eleitoral (STAE) Domingu (20/05) hahu distribui material sensitivu no laos sensitivu ba ba sentru votasaun 100 iha Munisipiu Covalima.
Diretór STAE Munisipiu Covalima, Francisco Gusmão, iha nia diskursu hateten, prosesu tomak ne’eba STAE Covalima hala’o hahu husi loron 12 fulan Maiu 2023, iha loron ne’ebe STAE munisipiu simu material sensitivu no laos sensitivu ba eleisaun parlamentar 3023 husi STAE nasional mai STAE munisipiu.
“Iha loron kmanek ida ne’e ita hotu haksolok hodi hala’o serimónia komemorasaun loron independensia ba dala XXI, aumesmu tempu hala’o mos lansamentu distribuisaun material sensitivu no laos sensitivu ba sentru votasaun hotu ne’ebe destakadu iha Munisípiu Covalima hamutuk sentru votasaun 100” informa Diretór STAE Munisipiu Covalima Francisco Gusmão iha nia intervensaun hafoin hala’o distribuisaun material sensitivu no laos sensitivu ne’ebe hala’o iha resintu Administrasaun Munisípiu Covalima.
Nia haktuir durante viazem husi STAE nasional mai munisipiu ekipa konvoi transportasaun material sensitivu no laos sensitivu hetan asidente iha dalan maibe laiha pesoal ruma maka hetan sofrementu grave, ho ekipa konvoi transportasaun material sira ne’e duni iha fatin edifisiu STAE Munisipiu Covalima iha loron 13 fulan tinan 2023 kontinua hahu halo verifikasaun ba material hirak ne’ebe to’o iha Covalima husi ekipa STAE halo serbisu verifikasaun ba bulletin votus no kontinua halo pakotementu ba material sira hodi bele distribui ba iha sentru votasaun hamutuk 100 no estasaun votusaun hamutuk 120.
Iha atividades refere hetan supervizaun CNE no iha fiskalizaun husi fiskais kandidatura partidu politiku inklui observador nasional maka hanesan RENETIL ho CAUCUS, iha atividades refere hetan mos asistensia seguransa husi parte PNTL Munisípiu Covalima ne’ebe destaka iha postu seguransa STAE Munisipiu Covalima ninian.
Tanba ne’e husi atividade lubuk ida ne’ebe konsege ultrapasa no ohin loron 20 de Maiu 2023 iha Munisípiu Covalima hahu hala’o serimónia lansamentu distribuisaun material sensitivu no laos sensitivu sentru votasaun 100 no estasaun votusaun 120.
“Ho hirak ne’e hotu hanesan Diretór STAE Munisipiu Covalima hakarak hato’o lia menon ba brigadista sira atu hala’o ita boot sira nia knar iha sentru votasaun no estasaun votusaun ho didiak hodi kaer metin ba lema STAE ninian, nune’e STAE sira serbisu ho imparsialidade, transparensia no neutralidade” nia dehan.
Nia sublina iha parte importante ida ba brigadista sira tenke asegura didiak material sira ne’ebe maka simu ohin loron lori ba to’o sentru votasaun ho kondisaun seguru nafatin maske hasoru dezafius oi-oin sei la difikulta ba material sira ne’ebe asegura.
Brigadista sira mos tenke iha responsabilidade masimu tuir kna’ar ne’ebe imi simu hanesan prezidente sentru votasaun iha loron eleisaun, espera katak serbisu sira ne’e imi hala’o laiha intervensaun husi kualker se deit liliu iha prosesu kontajen inisial iha sentru votasaun.
Karik mosu dezentendimentu ruma iha sentru votasaun husu atu kontaktu ba parte seguransa para bele hetan atendimentu hodi normaliza situasaun nune’e normal fila fali atu prosesu votasaun bele lao kontinua.
Husu mos ba observador no fiskais husi kandidatura sira ne’ebe maka iha Munisipiu Covalima atu akompaña materil sensitivu no laos sensitivu ba iha sentru votasaun ida-idak, no depois de votasaun hodi rekolla material sira ne’e fila fali mai iha apuramentu munisipal.(azu)
