Covalima (RCCT), 12 Outubru 2026 — Autoridade Protesaun Sivil (APC) distribui material konstrusaun ba uma-kain 11 ne’ebé sai vítima dezastre naturál iha fulan Abril no Maiu tinan 2026, iha Munisípiu Covalima.

Uma-kain hirak ne’e mai husi Suku Zulo, Postu Administrativu Zumalai, uma-kain ida, no Suku Oges, Aldeia Fororua, Postu Administrativu Maucatar, uma-kain 10.

Prezidente APC, Jesunio Matos Carvalho, informa katak distribuisaun material konstrusaun ne’e atu fó apoiu ba família sira ne’ebé afetadu husi dezastre naturál.

Nia esplika katak material konstrusaun ne’e iha ona iha armazén, maibé prosesu orsamentu halo distribuisaun demora uitoan. Tanba ne’e, Governu sei buka dalan atu kria fundu kontijénsia, hodi bele responde lalais bainhira dezastre akontese.

“Uma-kain hamutuk 11, husi Zumalai uma-kain ida, Suku Oges uma-kain 10. Ita-nia material konstrusaun iha armazén ne’e barak hela. Dezastre kuandu akontese, ita to’o kedas, sistema orsamentu mak halo demora uitoan. Governu hanoin tok oinsá bele iha fundu kontijénsia hodi responde lalais, no ohin entrega material konstrusaun ba ita boot sira, hanesan sementu, kalen no besi,” Jesunio Matos Carvalho informa.

Nia husu mós ba APC no autoridade lokál sira atu kontinua fó avizu ba komunidade, liuliu agora tama ba tempu bailoro naruk, atu evita sunu rai arbiru no halo hahalok ne’ebé bele kauza dezastre naturál.

Nia hatutan katak apoiu ne’e la’ós atu harii uma foun kompletu hanesan uma ne’ebé família sira hela antes, maibé atu ajuda sira iha nesesidade bázika, liuliu atu taka mahon hodi enfrenta udan no loro.

“Governu la tau osan halo uma di’ak hanesan uma ne’ebé antes ne’e imi hela, maibé pelumenus bele ajuda imi taka netik mahon oan ruma hodi responde ba udan no loro hodi bele hetan dignu. Kona-ba imi-nia osan kategoria estragu totál, imi sei simu US$ 150 ne’e hodi selu transporte ne’ebé tula material sira, US$ 850 ne’e hodi selu badaen,” Jesunio Matos Carvalho hatutan.

Koordenadór Jestaun Dezastre Naturál Munisípiu Covalima, Filomino Cardoso, informa katak distribuisaun ba família vítima sira sei kontinua, atu asegura katak família afetada sira hotu bele simu apoiu.

“Loloos ne’e iha fulan kotuk ita realiza tiha ona distribuisaun ne’e, maibé Xefe Suku Belecasac hakarak distribuisaun ne’e ba vítima hotu-hotu kedas. Ba xefe família lima-nulu resin, no xefe família 11 mak ohin loron ita distribui, aban ita mós sei kontinua distribui tan ba família 45 iha aldeia hirak ne’ebé mak vítima ba rai halai,” Filomino Cardoso informa.

Enkuantu ne’e, Segundu Komandante PNTL Munisípiu Covalima, Superintendente Asistente Patricio de Jesus, husu ba autoridade komunitária sira atu monitoriza distribuisaun material apoiu ne’e, hodi asegura katak material hirak ne’e uza tuir finalidade no la’ós atu fa’an fali.

“Ha’u husu ba autoridade komunitária sira atu monitoriza buat ne’ebé sira fahe, tanba média sempre foka dehan katak buat sira ne’e fahe ba imi, la’ós fahe atu fa’an tutan. Tanba ne’e, kuidadu didi’ak. Ida ne’e Estadu hadomi imi, Estadu haree imi-nia susar mak fó ajuda ba imi. Se uza karik, uza ba imi-nia privadu duni,” Patrisiu de Jesus afirma.

Material konstrusaun ne’ebé APC distribui ba vítima dezastre naturál sira inklui:

– Kalen tahan 50;

– Prafuzu unidade rua;

– Martelu unidade ida;

– Pregu ho medida oioin;

– Kanuru boot no kanuru ki’ik;

– Arame finu kilogramas rua;

– Metru ida ho medida 100 metru;

– Balde massa neen;

– Besi kotak medida 5×10 no 4×6, kada ida ho lolon 25;

– Besi beton medida 10 milímetru no 8 milímetru, kada ida ho lolon 25; no

– Sementu saku 50.

Jornalista: J. Correia

Editór: Paul Mandeu