Covalima (RCCT), 09 Outubru 2026 — Komunidade agrikultór iha Postu Administrativu Suai, Munisípiu Covalima, hato’o preokupasaun kona-ba tratorista sira ne’ebé servisu iha Ministériu Agrikultura, Pekuária, Peskas no Floresta (MAPPF) Munisipiu Covalima, tanba sira husu osan husi agrikultór sira hafoin servisu fila rai.
Agrikultór ida, João Bosco, haktuir katak durante ne’e, kada tinan bainhira tratorista sira mai fila rai agrikultór nian, komunidade tenke selu osan ho montante entre US$ 20 to’o US$ 70, ba tratorista sira.
“Kada tinan trator mai fila rai agrikultór sira nian, ami sempre selu. Maibé ami la selu diretamente iha edifísiu MAPPF Covalima; ami selu ba tratorista sira tuir osan ne’ebé sira husu,” João Bosco relata.
Nia esplika katak montante osan ne’ebé agrikultór sira selu depende ba tratorista sira husu, no situasaun ne’e, tuir nia, akontese ba komunidade agrikultór sira.
“Iha tempu uluk, sira sempre husu US$ 25, US$ 30, maibé bele to’o US$ 70. Tinan ida ne’e, foin primeira vez ami haree montante US$ 60 no US$ 70,” nia hateten.
João Bosco kontinua hato’o dúvida kona-ba razaun ne’ebé agrikultór sira tenke selu diretamente ba tratorista, bainhira tuir nia, pagamentu ne’e tenke halo diretamente iha MAPPF Covalima.
Nia husu tan kona-ba prosedimentu pagamentu ne’e, tanba agrikultór sira lori dokumentu kona-ba medida rai ba edifísiu MAPPF Covalima, maibé bainhira servisu fila rai, tratorista sira kontinua husu osan.
“Ami hakarak hatene tanba saida mak ami tenke selu fali osan iha to’os ba tratorista sira, se karik pagamentu ne’e tenke halo diretamente iha MAPPF Covalima. Iha Suku Debus, tratorista na’in tolu mak baibain halo servisu fila rai,” João Bosco afirma.
Diretór Servisu Munisipál Agrikultura Rejeita Kobransa
Hatan ba preokupasaun ne’e, Diretór Servisu Munisipál Agrikultura Covalima, Lino Magno, lamenta tebes ho informasaun kona-ba autorizasaun atu tratorista sira husu osan husi agrikultór.
Nia esplika katak MAPPF la autoriza tratorista sira atu husu osan ba agrikultór sira. Maibé, bainhira mina ne’ebé Ministériu ka autoridade munisipál disponibiliza hotu ona, agrikultór sira bele sosa mina rasik atu fasilita kontinuidade servisu fila rai.
“Diresaun Agrikultura Munisipál Covalima la autoriza ema ida atu husu osan husi agrikultór sira. Bainhira orsamentu ne’ebé mai husi Diresaun Agrikultura no Munisípiu uza hotu ona atu sosa mina, agrikultór sira rasik mak bele ense mina ba trator atu fila sira-nia rai, ho kuantidade 40 litru ba kada hektare. Ida-ne’e mak prosedimentu ne’ebé durante ne’e ita jere. Se tratorista sira husu osan, ida-ne’e la’ós autorizasaun husi ami,” Lino Magno hateten.
Nia enfatiza katak tratorista sira tenke responsabiliza an tuir lei no prosedimentu ne’ebé vigora, tanba Diresaun Servisu Munisipál Agrikultura Covalima la fó autorizasaun ba tratorista sira atu husu osan husi komunidade agrikultór.
Jornalista: Paul Mandeu
