Covalima (RCCT), 20 Novembru 2026 – Komisaun Reguladora Arte Marsiais (CRAM) hala’o enkontru kordenasaun ho Komandu Polísia Nasionál Timor-Leste (PNTL) Munisípiu Covalima, atu hametin kooperasaun institusionál ba implementasaun Lei Nú. 19/2017 no prepara prosesu sosializasaun lei ne’e iha área juridisaun Munisípiu Covalima.
Prezidente CRAM Nasionál, Octávio da Conceição, esplika katak enkontru ne’e importante atu hametin kordenasaun ho PNTL, tanba PNTL iha responsabilidade ba seguransa no ordem públika iha territóriu Munisípiu Covalima tomak.
Nia mós hatete katak, CRAM antes ne’e halo ona kordenasaun ho Prezidente Autoridade Munisipál Covalima atu prepara prosesu reativasaun prátika Arte Marsiais. Prosesu ne’e sei hala’o liuhosi faze sira tuir prosedimentu no kondisaun ne’ebé determina.
“Visitasaun ohin mai Komandu PNTL Munisípiu Covalima ho intensaun atu halo kordenasaun servisu ba implementasaun Lei Nú. 19/2017 no preparasaun ba sosializasaun lei ne’e iha área juridisaun Munisípiu Covalima. Tanba Komandu PNTL Munisípiu Covalima mak asumi responsabilidade ba seguransa iha territóriu tomak, kordenasaun ho PNTL tenke halo uluk,” nia esplika.
Octávio mós hatete katak, iha dadeer ne’e, CRAM halo ona kordenasaun ho Prezidente Autoridade Munisipál Covalima kona-ba prosesu reativasaun Arte Marsiais.
“Prosedimentu atu reativa Arte Marsiais sei lao tuir faze sira. Primeiru, sei halo sosializasaun kona-ba lei ne’e. Depois, sei haree kondisaun mínimu sira ne’ebé organizasaun desportiva Silat sira hamutuk ho Federasaun Silat Timor-Leste tenke kumpre. Bainhira kondisaun mínimu sira kumpre, prosesu sei kontinua tuir orientasaun no diretiva ne’ebé sei estabelese,” nia dehan.
Nia hatutan katak, prosesu regulasaun ne’e sei involve komisaun sira ne’ebé estabelese tuir lei, inklui komisaun ne’ebé iha responsabilidade ba fiskalizasaun no monitorizasaun, no komisaun reguladora desportu Arte Marsiais.
Iha parte seluk, Komandante PNTL Munisípiu Covalima, Superintendente Xefe Polísia Paulino Ferreira, informa katak, husi fulan Janeiru to’o Novembru 2026, PNTL Munisípiu Covalima rejista kazu kriminál hamutuk 140, tuir livru rejistu kriminál manual.
Husi númeru ne’e, kazu tolu iha relasaun ho atividade Arte Marsiais, ne’ebé akontese iha fulan Juñu, loron 24 no 25. Kazu sira ne’e inklui atividade ne’ebé envolve ultrapasa fronteira ho dalan ilegál ba Kupang, Nusa Tenggara Timur (NTT), Indonézia.
“Husi fulan Janeiru to’o Novembru, ita rejista kazu kriminál hamutuk 140 iha livru rejistu kriminál manual. Husi kazu sira ne’e, kazu tolu mak iha relasaun ho prátika Arte Marsiais iha fulan Juñu, loron 24 no 25, inklui ultrapasa fronteira ho dalan ilegál ba NTT, Kupang, no fila fali liuhosi dalan ilegál,” nia esplika.
Paulino hatete katak, kazu sira ne’e akontese iha área Mota Masin, Wetaba no Salele. Nia mós informa katak, iha kazu sira ne’e, ema ida lakon vida no ema na’in haat agora iha prizaun preventiva tuir prosesu jurídiku ne’ebé lao hela.
Enkontru kordenasaun entre CRAM no PNTL Munisípiu Covalima ne’e sai parte husi esforsu institusionál atu hametin kooperasaun, asegura prosesu sosializasaun Lei Nú. 19/2017 no prepara kondisaun atu orienta, regula no monitoriza atividade desportiva Arte Marsiais iha Munisípiu Covalima.
Jornalista: Jefry Rastaky & J. Correia
Editor: Paul Mandeu





