Covalima (RCCT), 19 Novembru 2026 – Sekretariu Asuntu Sosíál Munisípiu Covalima, Filomeno Cardoso, husu ba ofisiál asuntu sosíál no sekretáriu suku sira husi suku 30 atu hametin koordenasaun no atualizasaun dadus benefisiáriu programa Bolsa da Mãe kada fulan.
Nia hatete katak atualizasaun dadus importante tebes atu garante katak informasaun ne’ebé rekolla iha komunidade akuradu, kompletu no reflete situasaun real benefisiáriu sira.
Iha diskusaun ho ofisiál asuntu sosíál no sekretáriu suku sira, Filomeno Cardoso esplika katak atualizasaun dadus presiza fó atensaun liuliu ba identifikasaun labarik foin moris, família vulnerável no ema sira ne’ebé seidauk rejista ka sira-nia dadus seidauk kompletu.
“Ohin ita mai koalia kona-ba atualizasaun dadus Bolsa da Mãe. Ita tenki serbisu hamutuk atu rekoilla dadus kada fulan, tanba iha labarik foin moris no ema vulnerável sira ne’ebé seidauk rejista. Dadus ne’ebé la atualizadu bele kria impaktu ba prosesu identifikasaun benefisiáriu.”
Nia mós enfatiza katak ofisiál asuntu sosíál no sekretáriu suku sira, hamutuk ema nain 120, tenki asume responsabilidade, kumpre oras servisu no prepara dadus ne’ebé konkretu. Dadus populasaun sei sai baze importante ba prosesu verifikasaun no vizita husi autoridade iha nivel nasionál, munisipál no postu administrativu.
Iha parte seluk, Diretora Apoiu ONG Munisípiu Covalima, Maria de Jesus Pereira, informa katak prosesu atualizasaun dadus sei hala’o liuhusi kolaborasaun entre xefe aldeia, sekretáriu suku no autoridade postu administrativu.
“Hau relata ona ba sira atu serbisu hamutuk ho xefe aldeia sira, atu labele atualiza dadus fulan tolu dala ida de’it, maibé kada fulan tenki atualiza. Husi loron 1 to’o loron 10, xefe aldeia sira tenki lori dadus ba sekretáriu suku. Depois, husi loron 10 to’o loron 20, autoridade postu sei halo rekapitulasaun dadus husi suku sira.”
Maria de Jesus Pereira husu mós ba estrutura administrativa hotu atu kumpre mekanizmu ne’ebé estabelese ona, hodi evita atrasu iha prosesu atualizasaun dadus no fasilita komunikasaun no koordenasaun entre instituisaun sira.
Ho mekanizmu atualizasaun dadus ne’e, Sekretariu Asuntu Sosíál Munisípiu Covalima espera katak dadus benefisiáriu programa Bolsa da Mãe bele nafatin atualizadu, kompletu no akuradu.
Dadus ne’ebé atualizadu sei ajuda prosesu identifikasaun, verifikasaun no distribuisaun apoiu sosiál atu hala’o ho di’ak, hodi asegura katak família vulnerável sira, liuliu labarik no ema sira ne’ebé presiza asisténsia, bele hetan apoiu tuir sira-nia direitu no nesesidade.
Jornalista: Jefri Rastaky
Editor: Paul Mandeu





