Sekretariu Estadu Kooperativa (SEKOOP) Arsenio Pereirra iha intervensaun hatete ba komunidade katak servisu agrikultor sira nian dadaun ne’e moderniza an ona liu husi halo ona inovasaun ba atividade fila rai uja trator.
” Atividade sira ne’ebe la’o ne’e kontinuasaun dezde bei ala sira tesik mai, so ke iha buat balu ne’ebe transforma ona, moderniza ona, iha ona inovasaun ne’e maka ohin ita bele fila ona rai uza trator, maibe nudar kamponezes, nudar ema ne’ebé servisu iha terenu ha’u hanoin desde uluk kedas, atu governu ne’ebé de’it mos mai atu kontinua, servisu sira ne’e hotu, inan aman sira, kamponezes sira, ami sira ne’ebe iha governu hanesan Sekretariu Estadu, diretór sira, ita boot sira maka fo han mai ami hahu husi prezidente republika to’o mai ema sira ne’ebé moris ida rai ida ne’e nia leten” Dehan SEKOOP Arsenio Pereirra ba to’os na’in sira iha Aldeia Bibi Atan. (17/09)
Sekretariu Munisipal Asuntu Adminsitrasaun no Finansas Munisipiu Covalima, Alberto Moniz de Araújo, husu ba to’os na’in sira atu simu programa kuda bafo kay rala ne’e tanba nonu governu prontu fo apoiu.
“Simu ba programa ida ne’e hodi hala’o no autoridade prontu atu apoiu imi, bainhira imi iha preokupasaun ruma, kestaun ruma liga ba imi nia preokupasaun ami prontu atu ajuda imi, servisu munispal agrikultura, tanba ne’e husu ba inan aman sira atu apoiu SEKOOP nia programa kuda Bafo Kay Rala” nia dehan.
Reprezenta komunidade, Xefe Aldeia Bibi Atan, Mateus Nunes Mesguita, agradese ba SEKOOP ne’ebé servisu hamutuk MOKATIL hodi fila rai gratuita ba komunidade sira.
“Iha tinan ida ne’e komunidade tomak iha Aldeia Bibi Atan sente kontente no agrades tanba fila rai gratuita ba ha’u nia komunidade, sira sente kontente tebes ba programa ida ne’e” nia dehan.
Iha okaziaun ne’e Sekretariu Jeral MOKATIL Munisipiu Covalima Elias Agustinho, husu ba to’os na’in sira iha Aldeia Bibi Atan atu kopera ho Governu liu husi SEKOOP no MOKATIL hodi Kuda Bafo Kay Rala.
Jornalista : Julio Salinas
Editor : Chamot Nahac
