Covalima (RCCT) 05-12-24-Diretór Servisu Munisipál Saude Covalima Domingos Sequeira, relata iha enkontru avaliasaun ba ezekusaun OJE 2024, Servisu Saude Covalima hetan atinjimentu ba ezekusaun di’ak ho 87%.
Orsamentu ne’ebé Govenu aloka husi liu OJE 2024 mai iha Saude Covalima hamotuk Dolar Amerikanu rihun atus ualu resin hat ($ 804,000.00) utiliza ba bens servisu, hodi hare liu ba iha lojistika no kuidadu saude primaria.
“Servisu saude munisipal hetan atinjimentu ezekusaun ne’ebé di’ak, ami nia orsamentu ba 2024 nian ami iha total orsamentu ho montante $ 804,000.00, maibe ami ezekuta ba bens servisu, liliu ami hare ba lojistika ho kuidadu saude primaria, husi orsamentu ne’ebé ami hetan atinji ona pursentu 87, signifika katatk sei hela uitoan deit ona ami bele atu atinje 100%” informa Diretor Servisu Munisipál Saude Covalima Domingos Sequeira.
Domingos akresenta, ho orsamentu ne’ebé governu aloka, Servisu Munisipal saude Covalima hala’o atividades hamotuk nen.
“Ami nia programa maka hanesan ha’u hatete ona, programa ba iha kuidadu saude primaria deit, ami iha programa ida iha sub-programa 5 ho atividades ami iha 6, maibe ami halai liu ba lojistiku ho kuidadu saude primaria, liliu hare ba saude na familia, hare liu ba moras ne’ebé tenke vizita husi ami, hare programa SISCA, mobil klinika, ida ne’e maka ami nia atividade durante ne’e hala’o” nia dehan.
Tuir Diretór Servisu Munisipál Saude Covalima Domingos Sequeira, mos relata konaba la atiji taxa ezekusaun ba 100% iha Servisu Saude Covalima relasiona ho seidauk halo manutensaun ba edifisiu tanba prosesu tomak tenki liu husi Aprovizionamentu.
Engkuantu Munisipiu Covalima foin mak Atinje 74,1% ba taxa ezekusaun OJE 2024, kompara ho munisipiu sira seluk ne’ebé liu ona Pursentu refere.
Jornalista : Julio Salinas
Editor : Chamot Nahac
