Covalima (RCCT), 15 Outubru 2026 — Asosiasaun Feto Hamatut ba Dezenvolvimentu Covalima husu ba Governu, liuhosi Ministériu Agrikultura, atu aumenta apoiu ba feto agrikultór sira iha Suku Matai, Postu Administrativu Maucatar, Munisípiu Covalima, hodi hadi’a produsaun agríkola no hametin ekonomia família sira-nian.
Pedidu ne’e aprezenta iha ámbitu komemorasaun Loron Internasionál Feto Rurál, ne’ebé selebra kada loron 15 fulan Outubru, hodi valoriza kontribuisaun feto rurál sira iha agrikultura, seguransa alimentar, ekonomia lokál no protesaun ambiente.
Asosiasaun ne’e konsidera katak feto rurál sira iha papél importante iha dezenvolvimentu komunidade, liuliu liuhosi produsaun ai-han, jestaun rekursu lokál no kriasaun atividade ekonómika ne’ebé bele hadi’a moris família sira-nian.
Iha Postu Administrativu Maucatar, feto rurál sira hahú organiza an iha grupu agrikultura, grupu poupansa no empréstimu osan, no grupu prosesamentu ai-han lokál atu transforma produtu tradisionál ba produtu ho valór aumenta.
Inisiativa hirak ne’e iha objetivu atu aumenta produsaun, kria oportunidade rendimentu ba feto sira no kontribui ba kresimentu ekonomia lokál.
Asosiasaun ne’e subliña katak feto rurál sira la’ós de’it ajuda responde ba nesesidade família nian, maibé mós iha kompromisu atu partisipa ativu iha dezenvolvimentu komunidade no nasaun.
Tanba ne’e, asosiasaun husu Ministériu Agrikultura atu fó apoiu ba feto agrikultór sira iha Suku Matai, liuhosi asisténsia téknika, formasaun no asesu ba rekursu ne’ebé presiza atu dezenvolve sira-nia atividade agríkola.
Aleinde ne’e, asosiasaun mós husu ba sekretariadu estadu relevante sira atu apoia grupu feto ne’ebé hala’o atividade poupansa no empréstimu osan, no grupu feto ne’ebé prosesa ai-han lokál atu produz sasán ho valór aumenta iha Maucatar.
Asosiasaun hein katak apoiu husi Governu no instituisaun relevante sira bele hametin kapasidade grupu feto sira-nian, habelar oportunidade negósiu no aumenta sira-nia kontribuisaun ba ekonomia lokál.
Komemorasaun Loron Internasionál Feto Rurál sai oportunidade atu rekoñese kontribuisaun feto sira iha área rurál no hametin kompromisu atu garante sira-nia asesu ba oportunidade, rekursu no apoiu ne’ebé presiza ba dezenvolvimentu sustentável iha Timor-Leste.
Jornalista: J. Correia
Editor: Paul Mandeu
