Covalima (RCCT), 16 Outubru 2026 — Ministériu Juventude, Desportu, Arte no Kultura (MJDC), liuhusi Direção Nasionál Asosiativizmu Juventude (DNAJ), hamutuk ho Alumni Parlamentu Foinsa’e Timor-Leste (APFTL), hala’o sosializasaun kona-ba Parlamentu Foinsa’e Nian (PFN) no rekrutamentu membru ba períodu 2027–2029, ba joven sira iha Postu Administrativu Maucatar, Munisípiu Covalima.
Parlamentu Foinsa’e Nian (PFN) mak espasu ida ba joven sira ho idade entre tinan 12 no 17 atu aprende no pratika demokrasia, dezenvolve kapasidade lideransa no hetan formasaun sidadania, hodi sai sidadaun siviku no responsavel.
Diretór Direção Nasionál Asosiativizmu Juventude (DNAJ), Florindo Napoleão dos Santos Xavier, hateten katak programa ne’e importante tebes ba joven sira, tanba sira mak futuru no patrimóniu importante ba Estadu.
“Programa ida ne’e importante ba ita nia alin sira, tanba ita alin sira ne’e mak hanesan forsa ida Estadu nian no sira ne’e mak aset Estadu nian. Entaun, liuhusi IX Governu ida ne’e, nafatin fó prioridade, nafatin fó tempu, fó espasu ba ita nia alin sira hotu aprende,” nia hateten.
Nia esplika katak Parlamentu Foinsa’e hahú hala’o atividade iha tinan 2010, enkuantu Alumni Parlamentu Foinsa’e hahú iha tinan 2012. Nia mós subliña katak programa rua ne’e sai parte husi esforsu Estadu, liuhusi MJDC, atu dezenvolve kapasidade lideransa jovem sira.
Florindo Napoleão dos Santos Xavier mós enkoraja autoridade lokál, xefe suku, diretór eskola no profesór sira atu sai parseiru iha prosesu rekrutamentu, hodi asegura katak joven sira hetan informasaun kona-ba oportunidade ne’e.
“Ami mai hamutuk ho ita boot sira, liuliu ba xefe suku, ami nia diretór eskola no profesór sira, Prezidente Autoridade Munisipál no Administradór Postu Administrativu tomak, hotu-hotu sai hanesan parseiru Estadu nian. Ita bele alerta informasaun ba ita nia oan sira atu nune’e ita nia oan sira iha futuru sai líder, la’ós ba postu ida ne’e nian de’it, maibé mós bele lidera nasaun ida ne’e,” nia enkoraja.
Iha parte seluk, reprezentante pontu fokál APFTL iha Postu Administrativu Maucatar, Lucas Gusmão do Nacimento, esplika katak APFTL mak organizasaun juvenil ne’ebé forma husi membru Parlamentu Foinsa’e antigu sira, ho objetivu atu dezenvolve kapasidade jovem sira.
“APFTL hanesan organizasaun juvenil ne’ebé forma husi ex-membru Parlamentu Foinsa’e sira komesa iha 2009. APFTL mós mai ho nia visaun ida, oinsá atu forma joven sira sai siviku, saudavel, kritiku, kompetitivu no orgullu nu’udar Timoroan,” Lucas Gusmão do Nacimento hateten.
Partisipante Junicia Gusmão Amaral, ho idade tinan 15, hato’o nia kontentamentu tanba hetan oportunidade atu partisipa iha sosializasaun ne’e. Nia dehan katak atividade ne’e ajuda aumenta nia koñesimentu kona-ba kritériu no prosesu atu sai membru PFN.
“Ha’u kontenti tebes tanba ha’u bele hetan formasaun husi Parlamentu Foinsa’e Nian, tanba ida ne’e bele fó koñesimentu kona-ba kritériu oinsá atu sai membru Parlamentu Foinsa’e Nian. Bazeia ba formasaun ne’ebé mak ha’u hetan, ha’u rasik mós iha inisiativa atu sai membru husi Parlamentu Foinsa’e Nian, tanba ida ne’e bele aumenta ha’u nia kapasidade no mentalidade,” Junicia hateten.
Kritériu ba kandidatu membru PFN
Kandidatu sira ne’ebé hakarak sai membru Parlamentu Foinsa’e Nian tenke kumpre kritériu hirak tuirmai:
– Sai sidadaun Timor-Leste.
– Iha idade entre tinan 12 no 17.
– Apresenta fotokópia Billete Identidade ka dokumentu legál seluk ne’ebé identifika aplikante.
– Hela iha Postu Administrativu ne’ebé kandidatu aplika ba.
– Apresenta fotokópia dokumentu identifikasaun inan-aman ka kuidadór legál, hanesan Billete Identidade ka Kartaun Eleitorál.
– La asume kargu ruma iha partidu polítiku.
– Apresenta deklarasaun husi suku.
– Apresenta atestadu médiku (opsionál).
Istória períodu mandatu membru PFN
Bazeia ba informasaun ne’ebé aprezenta durante sosializasaun, Parlamentu Foinsa’e Nian iha ona períodu mandatu lima, ho númeru membru hanesan tuirmai:
– Períodu I (2010–2012): membru 130.
– Períodu II (2013–2015): membru 132, inklui membru ho defisiénsia.
– Períodu III (2016–2018): membru 130.
– Períodu IV (2019–2022): membru 132, inklui membru ho defisiénsia.
– Períodu V (2023–2026): membru 142, inklui membru ho defisiénsia.
Sosializasaun ne’e nia objetivu mak atu hasa’e koñesimentu jovem sira nian kona-ba Parlamentu Foinsa’e Nian no prepara sira atu partisipa iha prosesu rekrutamentu ba períodu mandatu tuirmai, 2027–2029.
Jornalista: J. Correia
Editór: Paul Mandeu
