Cobalima (RCCT) 21-05-23 Dadur hamutuk ema na’in-27 iha prizaun Suai labele ezerse sira nia direitu ba vota iha eleisaun parlamentar tinan 2023 tanba laiha kartaun eleitoral.

Diretór Prizonzaun Suai, Julio Dias Ximenes, hateten, dadur sira iha prizaun Suai ne’ebe ezerse sira nia direitu ba vota iha eleisaun parlamentar tinan ida ne’e hamutuk ema na’in-75, maibe iha dadur na’in-27 maka labele ezerse sira nia direitu ba vota tanba laiha kartaun eleitoral.

“Iha prizaun Suai ita nia maluk prizoneiru hamutuk ema na’in-75 maka tuir vota tanba sira iha kartaun eleitoral, maibe ba prizoneiru na’in-27 maka la vota tanba kartaun eleitoral laiha” informa Diretór Prizonzaun Suai, Julio Dias Ximenes, ba jornalista sira hafoin remata akompana brigadista, poling staff, CNE no fiskais partidu politiku inklui mos akompana husi polisia sira lori urnas no bulletin de votus lori ba iha Prizaun Suai hala’o vota ambulante ba prineiru sira Domingu (21/05).

Diretór prizaun Suai ne’e konfirma katak dadur hamutuk ema na’in-27 ne’e la vota iha festa demokrasia ida ne’e tanba razaun kartaun eleitoral laiha maibe antes ne’e mos husi parte prizaun konfirma ona prizoneiru ne’e laiha duni kartaun eleitoral.

Nia dehan vota ambulante iha prizaun Suai hahu iha tuku 9:15 no remata iha tuku 10:30 oras Timor-Leste.

Nia realsa prizoneiru hamutuk ema na’in-75 no guarda prizaun Suai hamutuk na’in-20 maka fo sira nia diretu vota iha eleisaun parlamentar tinan ne’e.

“Ohin vota ambulante hala’o iha ita nia prizaun Suai sira laos deit ba maluk sira ne’ebe dadur maibe inklui mos guarda prizaun hamutuk ema na’in-20 maka tuir vota, ita iha total guarda prizaun na’in-37 maibe iha balu guarda na’in-17 ezerse sira nia diretu vota iha liur tanba sira ohin.la tama serbisu, sira na’in-20 tama serbisu ne’e maka vota hamutuk ho dadur sira iha ne’e” nia esplika.

Nia realsa dadur na’in-27 la tuir vota tanba sira laiha dokumentus liliu kartaun eleitoral, maibe antes ne’e kedas fo ona avizu tiha ona maibe defisil tebes bainhira atu trata ba dadus sira atu trata sira nia dokumentus eleitoral tanba ema tenke ida-idak tenke to’o iha nia munisipiu maka bele trata nia eleitoral.(JS)