Covalima (RCCT) 27-03-25-Wainhira halo Vizita ba Postu Administrativu Tilomar hodi distribui nesidade bazika ba Familia K’bit naton no espesial sira iha Suku Beiseuk. Presidente Republika Jose Manuel Ramos Horta senti triste hare kondisaun Estrada ligasaun Postu Administrativu Tilomar no Fatumea.
Xefe Estadu Timor Leste ne’e Triste tanba kondisaun estrada at difikulta Komunidade sira moris ho vida agrikultor atu asesu ba merkadu no fo ameasa ba sira wahira halo viazen ho transporta publiku no privadu atu asesu ba nesesidade iha kapital Munisipiu Covalima.
“Senti triste kondisaun estrada ne’ebé ligasaun Postu Tilomar liu ba Postu Fatumea ne’ebé besik liu liña fronteria, komunidade sira moris ho vida agrikultor, tenke tau Estrada, depois populasaun sira ne’ebé kuda sasan, hakiak animal fasil ba merkadu se lae, estrada la iha, dalan at, ema ne’ebé aluga kareta tula sasan, aluga kareta folin karun tebe tebes, entaun oho tia nesesidade familia, agrikultor buka moris ne’e mak realidade ekonomia, buat sira ne’e hotu hotu labele halo deit estrada rural tenki hanoin mos dezenvolvimentu integradu hodi nune’e sira bele hakiak animal no koto ruma” Xefe Estadu Timor Leste, Jose Manuel Ramos Horta, Informa.
Administrador Postu Administrativu (APA) Tilomar, Venancio Sarmento, relata ba Prezidente Republika katak durante tinan barak ona Populasaun Rihun sanulu resin sei asesu ba estrada ne’ebé ladignu hodi halo movimentasaun no transposta produtu lokal asesu ba merkadu iha kapital Munisipiu Covalima.
“Agradese ba presidente tanba primeira ves mai vizita Suku Beiseuk hodi akompaña situasaun ida ne’e, hodi hare direita kondisaun estrada ne’ebé mak grave tebes, durante ne’e ami utiliza hela no ami mos hakarak relata ba Presizente Republika iha ne’e Postu Tilomar ho nia Suku hat ho nia populasaun rihun sanulu resin ida atus hat tolu nulu resin lima (11.435). Administrador Postu Administrativu (APA) Tilomar, Venancio Sarmento, relata.
Engkuantu Tinan ne’e, Governu da sia liu husi Servisu Munisipal Obras Publika no Transporte (SMOPT) Munisipiu Covalima, tau prioridade ba projetu konstrusaun estrada rural ligasaun Postu Administrativu Fatumae, Fatululik no Postu Administrativu Suai iha area Tobur. Ne’ebé tama ona iha faze kontratu ba konstrusaun.
Notisia Relevante : https://www.rcct.tl/konstrusaun-estrada-harekain-liga-ba-kasa-kategoria-tenderizasaun-estrada-nasional/
Entretantu Postu Administrativu Tilomar lokaliza besik ba fronteira rai maran entre Covalima Timor Leste ho Malaka no Belu NTT Indonezia. Tilomar iha luan area 194.60 kilo metru kuadradu, kompstu husi Suku 4, Aldeia 23 ho tolal populasaun tuir sensu 2022 hamutuk ema 9.977.
Jornalista : Alfredo Barreto
Editor : Chamot Nahac
