Covalima (RCCT) 11-12-24-Parlamentu Nasional (PN) liu husi Komisaun-G ne’ebé trata asuntu Edukasaun Juventude Kultura no Sidadania, hala’o fiskalizasaun ba OJE 2024 ne’ebe aloka Ministeriu Edukasaun hodi halo programa no Projetu komunitariu iha Munisipiu Covalima.
Infiskalizasaun ne’e Komisaun G Parlamentu Nasional konsidera ezekusaun atividade iha Munisipiu Covalima atinji rejultadu ne’ebé di’ak.
“felismente iha Covalima projetu komunitaria 9 iha eskola 6 maka utilizadu ona falta eskola 3, maibe la’os ninia ezekusaun presentajen ki’ik maibe presentajen bo’ot, hela uitoan de’it atu finaliza hodi entrega ba edukasaun, ida ne’e maka informasaun di’ak tebes ba edukasaun ba area infraestrutura iha munisipiu ida ne’e” informa Vise Prezidente Komisaun-G Deputadu Grabriel Soares.
Xefe Departamentu Jestaun Programa Edukasaun Munisipiu Covalima, Gregorio Ferreira Afonso, mos relata ba Komisaun G Parlamentu Nasional konaba implementasaun Programa merenda eskolar ne’ebé implementa durante ne’e maske hasoru difikuldade balu hodi nune’e tenki devolve fali osan balu ba kaixa estadu.
“Ha’u mos aprezenta ba deputadu sira husi Komisaun-G katak ezekusaun orsamentu ba programa merenda eskolar la’o hela, ita iha difikuldade tanba iha fulan Janeiru to’o Abril la han tan ne’e osan balu tenke devolve fali ba iha kofer estadu, maibe 2025 bele la’o di’ak tanba agora aselera hela dadus, mapamentu prepara ona no ita hein sei halo kontratu ba sira Ekipa Jestaun Programa (EJP) 5 iha munisipiu Covalima atu sira bele buka kompañia ruma liu husi aprozionamentu sira bele tein, ita mos prepara hela dadus balu atu EJP sira bele asina kontratu ba 2025 atu nune’e implementasaun ho baze legal” nia dehan.
Komisaun-G Parlamentu Nasional mos simu kestaun no preokupasaun barak ne’ebé diretór eskola sira hato’o konaba eskola balu laiha moru, menus manorin na’in, tanba ne’e mak diputadu sira husi Komisaun G sei relata iha Parlamentu Nasional hodi bolu atensaun ba governu liliu Miniteriu Edukasaun atu toma atensaun ba kestaun ne’e.
Jornalista : Julio Salinas
Editor : Chamot Nahac
