Covalima RCCT 05-04-24-Hahu husi tinan 2019 to’o 2023 Servisu Saude Covalima rejista Pasiente moras HIV/SIDA hamotuk ema na’in 40, maibe iha rohan tinan 2023 Pasiente na’in ida hafoin deteta positivu HIV SIDA, halai sai husi tramentu hodi ba hela iha Atambua hafoin iha Covalima pesoal saude sira deteta hetan pozitivu ba kazu moras HIV.

Tuir Kordenador Programa HIV/SIDA Munisipiu Covalima, João Ramalho, hatete Maske pasiente na’in ida halai tiha ba Atambua, maibe pasiente na’in-39 kontinua halo tratamentu saude iha Suai.

“Iha pasiente na’in ida depois deteta hetan, nia hala’i ba Atambua Indonesia foin lalais iha iha Q-4 2023, deteta hotu nia langsung lakon nia paraderu iha Covalima mosu fali iha Atambua, maibe ba pasiente sira seluk kompostu husi sira na’in-39 ne’e kontinua halo tratamentu iha Suai tanba nudar Suai oan ida-idak hela iha nia uma, agora iha mos pasiente na’in-16 transferensia ba munisipiu seluk, balu ba eskola, balu ba servisu hodi kontinua halo tratamentu iha fasilidade saude sira ne’ebé besik sira, maibe ba sira na’in-39 ne’e hela duni iha Suai ami halo kontrolu ba sira fo tratamentu” dehan Kordenador Programa HIV/SIDA Munisipiu Covalima, João Ramalho, ba jornalista sira iha nia kna’ar fatin Servisu Saude Munisipiu Covalima Kinta (04/04).

Kordenador Programa HIV/SIDA Munisipiu Covalima, João Ramalho, esplika wainhira pesoal saude sira deteta hetan pasiente positivu HIV/SIDA, maka imidiatemente halo kedas tratamentu counseling nune’e labele transmite virus ne’e ba ema seluk.

“Sira ne’ebé maka kuandu ita deteta hetan iha momentu ne’eba kedas ita halo counseling ba pasiente refere oinsa atu bele prevene an atu labele halo transmite ba ema seluk liliu ba iha fen kaben no tenke rutina halo tratamentu ne’e importante, bainhira nia halo tratamentu rutina posibilidade bo’ot nia labele hada’et moras at ne’e ba ema seluk, ho ida ne’e maka ami halo kontrolu ba sira kada fulan sira tenke mai foti ai moruk hodi konsumu kada loron iha sira nia vida tomak, maneira seluk ita halo liliu atu redus ba kazu foun maka liu husi sosializasaun fahe informasaun kada eskola, ba iha komunidade sira atu nune’e sira bele prevene sira nia an hodi labele afeita mos ba sira” nia dehan.

Nune’e Kordenador Programa HIV/SIDA Munisipiu Covalima, João Ramalho,husu ba komunidade liliu ba joven sira atu labele monu ba hahalok risku sira hodi labele halo relasaun seksual arbiru ho ema ne’ebé la kuñese, labele naran tatto, tanba liu husi tatto mos bele afeita ba iha HIV, husu mos ba sira ne’ebé kaben na’in liliu ba feto sira bainhira isin rua tenke lalais ba iha fasilidade saude atu nune’e hodi hetan teste pakote HIV, hepatitis B atu nune’e hodi bele prevene antes, para virus refere labele hadaet tutan ba bebe iha kabun laran no ba nia parseiru ka katuas oan, no husu mos ba familia pasiente ida ne’ebé oras ne’e halai lakon husu familia sira atu kontaktu fali maluk ne’e bele fila husi Indonezia mai timor, nune’e hala’o fali tratamentu iha fasilidade.

Jornalista : Julio Salinas

Editor : Chamot Nahac