COVALIMA (RCCT) 21-12-23—-Ministeriu Edukasaun (ME) hasai ona sirkular ida bandu eskola hotu iha teritoriu laran tomak labele suku farda ka uniforma ba estudante sira tuir eskola ida nia gostu deit.
Auditor Gabinete Inspesaun Jeral Ministeriu Edukasaun, Jose Cardoso Dos Reis, hatete komesa tinan 2024 ba oin eskola ida idak labele suku farda tuir nia hakarak, basa Ministeriu Edukasaun dadaun ne’e elabora hela modelu farda ne’ebé uniformaduba eskola sira.
“Ita hotu-hotu tenke kumpri sirkular katak ba oin ka hahu tinan oin eskola ida idak la suku farda tuir nia hakarak, ministeriu agora elabora hela modelu ba kada nivel eskolaridade uniku modelu ida deit, pre-eskolar modelu ida deit, ensinu baziku ida deit, ensinu secundaria modelu ida deit no tekniku vokasional modelu ida deit” iha intervensaun Auditor Gabinete Inspesaun Jeral Ministeriu Edukasaun, Jose Cardoso Dos Reis, hafoin hala’o enkontru urjente ho diretor eskola sira iha Eskola Sekundaria Geral Publika Suai Kinta (21/1).
Tan ne’e Jose Cardoso dos Reis, husu ba manorin na’in sira iha eskola hotu ne’ebé halo rejistu simu estudante foun iha eskola hotu iha Covalima labele husu osan ba inan aman sira.
“Husu ba eskola sira agora daudaun halo hela matrikula ba alunus labele husu osan husi labarik nia inan aman, iha tempu besik ministeriu sei hatudu katak modelu farda ba alunus pre-eskolar ninia modelu mak hanesan ne’e tekvok nia modelu mak hanesan, husu ba inan aman sira atu ba suku tuir modelu ida ne’e, ne’e husu ba inan aman sira la’os husu ba eskola ba suku farda tuir duni modelu ida ne’e, farda ne’e depende ba inan aman nia forsa, ezemplu agora obralan barak inan aman sira ne’ebé kbi’it la to’o ne’e bele ba sosa obralan hodi mai bele suku tuir modelu ne’ebé ministeriu fo sai, eskola prepara deit emblema naran eskola nian tau ba iha farda ne’ebé ministeriu fo ba inan aman sira suku rasik, ne’e ministeriu maka deside tanba ne’e husu eskola hotu tenke kumpri lei ne’ebé maka ministeriu fo sai ona” nia dehan.
Entertantu Auditor Gabinete Inspesaun Jeral Ministeriu Edukasaun, Jose Cardoso dos Reis, dehan eskola hotu tenke halo tuir sirgular ne’ebé fo sai katak eskola labele prepara farda ba alunus sira maibe ministeriu fo ba inan aman sira maka atu suku rasik farda tuir modelu ne’ebé ministeriu fo sai ona.
Jornalista : Julio Salinas
Editor : Chamot Nahac
