Covalima (RCCT) 26-05-25-Ministerio Agrikultur Pekuaria,Peskas no Floresta (MAPPF) hamutuk ho Autoridade sira iha Munisipiu Covalima hala’o serimonia kolleta hare uza ekipamentu modernu ho objetivu atu redus tempu servisu no redus gastus ba agrikultor sira.
Ministru Agrikultura Pekuaria, Peskas no Floresta, Marcos da Crus hatete utiliza makina modernu bele ajuda agrikultor sira hala’o servisu ho lalais no bele apoiu kontribui ba hasa’e produsaun agrikola.
“Ita mai introdus makina ko’a hare modernu ba agrikultor sira iha Munisipiu Covalima liliu iha Beilaku, tanba makina sira ne’e importante ba ita nia agrikultor atu sira bele halao servisu iha natar hodi produs hare no nia vantage maka atu redus tempu servisu ba agrikultor sira no mos redus kustu iha prepara rai redus kustu iha kuda hare no mos redus kustu iha kolleta hare no ida ne’e mos fo vantagen wainhira sira fa an sei bele hetan benefisiu barak liu no lukru barak liu, tanba kustu operasional ida ne’e redus ona no aumenta kuantidade no mos aumenta produsaun. Uluk utiliza instrumentu ne’ebé tradisional hanesan tudik hodi ko’a hare, ne’e hare barak mak lakon iha natar, laran depois ko’a tia hare balu monu hela kuandu la lori lalais ba hamos no mos kuandu udan monu rai sei estraga nia kualidade. Depois to’o hamos mos ita normalmente utiliza maneira, uza anin no ida ne’e mos sei lori sai hare barak no mos han tempu no iha ema mak halo servisu, natar na’in tenki selu ema. Tanba ne’e maka governu buka atu moderniza ita nia setor agrikultor sira liu husi apoiu makina modern sira ne’e, ita fo apoiu para bele atria ita nia agrikultor sira” Ministru Agrikultura Pekuaria, Peskas no Floresta, Marcos da Crus hatete.
Iha fatin hanesan Sekretariu Munisipal Administrasaun no Finansas, Alberto Moniz de Araújo hatete utiliza ekipamentu modernu bele ajuda hakman servisu agrikultor nian no mos fasilita sira atu halo servisu ho rapidu nune’e bele hasa’e prudusaun.
“Natar iha Beilaku, Suku Raimea, iha 4 mil hektares. Kuaze 380 hektares funsiona ho di’ak, komunidade sira bele utiliza natar. Beilaku parte Zumalai uluk area transmigrasi ne’ebé mak kuñesidu halo produsaun agrikola ne’ebé makas liliu, Agora ho teknoliojia, ida ne’e programa nonu governu liu husi exelensia nia programa agrikultura nian komunidade sira mos senti orgullu bele uza makina ne’e servisu ne’ebé mak rapidu hodi nune’e sira bele hasa’e sira nia produsaun haree iha Beilaku.” Sekretariu Munisipal Administrasaun no Finansas, Alberto Moniz de Araújo.
Agrikultora Trifonia Lopes, agradese ba apoiu ne’ebé governu liu ministeriu agrikultor fornese ba sira hodi tulun hakman sira nia servisu iha natar.
“Ha’u sente orgullu tebes, Ministerio Agrikultor ne’ebé mak fahe makina. Ne’e ami kontenti tanba ida ne’e bele hakman ona ami nia servisu no ami feto sira mos ladun servisu todan ona no ami mos pronto ba oin atu hasa’e produsaun tanba tinan ne’e ami senti produsaun sa’e makas” Agrikultora Trifonia Lopes.
Entretantu iha Serimonia kolleta haree uza ekipamentu modernu ne’ebé realiza iha Suku Raimea, ne’e partisipa husi Ministru Agrikultur, Pekuaria, Peskas no Floresta, Sekretariu Munisipal Administrasaun no Finansas, Diretór Alfandega Covalima, no Autoridade Postu Zumalai no Xefe Suku Sira, inklui komunidade no grupo agrikultor sira ne’ebé partensia iha Postu Administrativu Zumalai.
Jornalista : Alfredo G. Barreto
Editor : Chamot Nahac
