Covalima (RCCT) 09-12-24-Ministeriu Adiministrasaun Estatal, (MAE) liu husi Dezenvolvimentu Lokal hala’o avaliasaun ezistensia ba Autoridade sira iha nivel Munisipiu no Postu Administrativu atu hatene difikuldade ne’ebé sira infrenta durante ne’e hodi bele prepara planu asaun ba tinan 2026.
Diretór Geral Dezenvolvimentu Lokal (DL) Virgilio da Costa hatete avaliasaun ezistensia atu hodi prepara kondisaun minimu ba tinan 2026 nian nudar politika husi desentralizasaun nian.
“Ita hatene katak avaliasaun kondisaun ezistensia ne’e atu preparasaun avaliasaun kondisaun minimu ne’ebé sei akontese iha tinan 2026, ne’e ita nia politika desentralizasaun hahu husi faze ida bolu deskonsentrasaun adiministrativa teritorial no agora daudaun ita tama ona desentralizasaun administrativa instituisional oinsa ita garante ba funsionamentu sira ne’e la’o di’ak para hatama ona ba iha faze tuir mai maka desentralizasaun teritorial, ida ne’e hanesan traballa Kasa bo’ot ida, ne’e depende ba ita nia kuadru munisipiu sira hahu husi prezidente autoridade ba to’o sekretariu munisipiu, servisu munisipais sira agora daudaun ne’e sira tenke prepara lakunas saida maka sira iha, dezafius saida maka sira iha, ne’e sira tenke identifika ona atu rekomenda, trasa planu ba tinan oin 2026 sira bele hadi’a” informa Diretór Jeral Dezenvolvimentu Lokal (DL) Virgilio da Costa ba jornalista sira hafoin hala’o avaliasaun ezistensia ba autoridade sira iha salaun enkontru Administrasaun Munisipiu Covalima Segunda (09/12).
Administrador Postu Administrativu (APA) Zumalai, Alipio Magno hatete persija hadi’a nafatin kondisaun minimu iha postu administrativu hotu, liu liu iha area Administrasaun no lojistika nian.
“Ami presija liu maka hare kondisaun minimu liliu hare mos parte lojistiku, administrasaun no kondisaun ba fatin servisu ninian ida ne’e presija ita hadi’a atu nune’e aban bainrua buat ne’e mosu karik mos ita servisu ho fatin ne’ebé seguru, konaba rekursu umanu provizoriamente preparadu ita nia nia ema matenek oan sira karik aban bainrua buat ne’e mosu sei loke tan konkursu balu ita preparadu atu kompete konkursu sira ne’e” nia dehan.
Entertantu atividades ne’ebé hanesan, antes ne’e govermu liu husi Ministeriu Administrasaun Estatal hala’o ona iha munisipiu-9 inklui Covalima no nune’e sei falta munisipiu tolu maka hanesan Baucau, Viqueque no Lautem ne’ebé sei kontinua realiza fali iha 2025.
Jornalista : Julio Salinas
Editor : Chamot Nahac
