COVALIMA—-Komunidade iha Suku Kamanasa, Postu Administrativu Suai, hamutuk benefisariu-4.606 simu ona xesta bazika ne’ebe distribui husi kompaña Paralel Unipesoál. Lda.
Diretór Kompaña Paralel Unipesoál, Lda, Zito Soares Magno hatete, kompaña ida ne’e maka manan tenderizasaun atu hodi bele distribui sasan xesta bazika ba komunidade sira iha suku rua hamesan Suku Kamanasa ho Suai-Loro, tan ne’e ohin kontinua fahe sasan iha Kamanasa tanba Suai-Loro hotu ona.
“Hau nia kompaña Paralel Unipesoál. Lda maka hetan oportunidade liu husi prosesu manan tenderizasaun, hodi hetan oportunidade fahe aihan xesta bazika iha Munisípiu Covalima liliu iha Suku Kamanasa ho Suai-Loro, agora Suku Suai-Loro ami rekolha hotu ona agora mai fila fali iha Kamanasa, ne’ebe tuir ami nia tarjetu ba loron, iha loron-2 fahe ai han no loron-2 tuir fali ami fahe kona-ba naan deit” informa Diretór Kompaña Paralel Unipesoál, Lda, Zito Soares Magno ba jornalista RCCT iha Aldeia Manekin, hafoin kompaña distribui aihan xesta bazika komunidade sira, Tersa (14/03).
Diretór Kompaña deklara razaun distribui naan ikus tanba kuandu distribui aihan akompana ho naan hotu maka tempu ne’e dada to’o Lorraine naan bele iis, tanba ne’e kompana foti desizaun katak loron rua ba distribui ai-han loron-distribui naan.
“Razaun tenke naan fahe ikus tanba ami hakarak fo buat ne’ebe ba komunidade hijenis, bainhira simu lori ba uma han ba mos prontu ita garante laiha moras buat ida, no naan labele iis oho mai fahe kedas” nia dehan.
Diretór Kompaña esplika kona-ba distribuisaun xesta bazika ne’e iha item hamutuk-11, kompostu husi foos rai kilograma-10, batar ikis kilograma-1, iha manu tolun, kafe masin midar, masin, ikan maran, mina tein, rinso inklui naan.
Nia dehan husi sasan item 11 kalkulasi ba osan ema ida hetan osan montante $ 48.75.
Diretór Kompaña Paralel Unipesoál.Lda Zito hateten durante halo distribuisaun ba sasan xesta bazika iha Suku Suai-Loro la hetan kritika husi komunidade no ohin mai iha Kamanasa mos hanesan la hetan kritika tanba kolaborasaun diak entre kompaña ho komunidade liliu joven sira iha suku rua refere.
“Hau mai iha Suai-Loro fofoun sira dehan kuidadu uitoan prontu isu sempre rona, mas mai to’o iha Suai-Loro diak hotu kedas to’o iha ne’eba hau ko’alia no apresia tebes tanba komunidade liliu joven sira hotu-hotu kolabora kapas loos laiha protesta tanba antes ne’e esplika klaru kedas kona-ba lalaok oinsa atu fahe sasan sira ne’e hotu ne’ebe hotu-hotu simu diak hotu kedas, agora mai iha Kamanasa mos hanesan laiha problema komunidade simu sasan hirak ne’e ho kontente hotu kedas” nia esplika.
Xefe Suku Kamanasa, Samuel Barros, konkorda ho sasan ne’ebé distribui husi kompaña Paralel Unipesoal. Lda tanba item sira ne’e mai tuir duni nesesidade komunidade nian.
“Antes atu fahe ba komunidade ami ho ekipa husi Sekretaria Estadu Kooperativa (SEKOOP) kompaña na’in ami sei fo avizu depois ami sei tetu ba komunidade haree direita karik sasan balu at iha sakola laran na’in bele mai fo hatene ami para hodi troka fila fali” nia esplika.
Xefe Suku afirma buat ne’ebé kompaña lori mai akompaña direita husi SEKOOP ne’ebé nudar autoridade lokal konkorda ho sasain sira ne’e tanba nesesidade komunidade nian ne’e apar hela ho situasaun.(Azu)
