Covalima (RCCT) 03-12-24-Ministra Solidariedade Sosial no Inkluzaun (MSSI), Veronica das Dores, hamutuk ho autoridade no Ema ho Difisiensia (EhD) iha Munisipiu Covalima selebra loron mundial ba ema ho difisiensia iha Timor-Leste 2024 ho tema mundial “Haforsa lideransa EhD ba futuru ida ne’ebé inkluzivu no sustentavel” no Tema nasional ” empodera EhD liu husi implementasaun planu asaun nasional ba EhD, periodu 2021-2030, hodi atinje dezenvolvimentu ida ne’ebe inkluzivu no sustentavel iha Timor-Leste”.
Iha nia diskursu Governante ne’e husu ba entidades hotu-hotu atu servisu hamutuk hodi responsaveliza ba programa inklusaun difisiensia.
“Iha intervensaun ida ohin loron ha’u lori governu liu husi MSSI no lori pesoal nia naran atu partilla informasaun balu konaba progresu atinjementu sira ho objetivu atu motiva nafatin ita bo’ot sira atu servisu hamutuk apoiu malu, aprende hamutuk, asuntu difisiensia ne’e nudar asuntu transaksaun signifika parte hotu-hotu iha responsabilidade apoiu programa tuir kna’ar ne’ebé keta-ketak, maibe programa inkluzaun difisiensia laiha fatin atu halo kompetisaun, programa inkluzaun difisiensia laiha fatin maibe ita hotu nia kna’ar ka responsabilidade ita hotu nian, alende atinjementu ne’ebé iha ona EhD sei hasoru difikuldade barak liliu maluk difisiente sira iha area remotas ne’ebé iha foho, tan ne’e ita presija servisu maka’as liu tan ho MSSI hakarak promove EhD iha Timor-Leste” Ministra Veronica kasu lia hirak ne’e iha selebrasaun loron mundia EhD iha Timor-Leste ne’ebé hala’o iha edifisiu Sentru Solidariedade Sosial no Inkluzaun Munisipiu Covalima.
Sekretariu Munisipal Asuntu Sosial no Organizasaun Komunitaria (Sek ASOK) Filomeno Cardoso, kongratula EhD iha Covalima ne’ebé komemora loron mundial ida ne’e, maske moris ho kondisaun limitadu maibe la moris mesak.
“Autoridade Munispiu Covalima hakarak kongratula dala ida tan ba ha’u nia doben sira ne’ebé mak ohin loron selebra ona loron mundial ida ne’e, maske ita bo’ot sira moris ho kondisaun ne’ebé limitadu tebes maibe fiar katak ita bo’ot sira la moris mesak, ita bo’ot sira nafatin sei moris ho familia sira, mos sorin seluk hamutuk ho ita nia nai Jesus Kristu sei akompaña ita bo’ot sira, ami hirak ne’ebé ho kondisaun fiziku ne’ebé di’ak, ho nai’ nia tulun tomak ne’e mak ohin loron ita hotu bele hamutuk iha fatin ida ne’e hodi selebra loron espesial ida ne’e, ami mos fiar katak ita bo’ot sira ho fiziku ne’ebé la hanesan ho ami maibe ita bo’ot sira nia hanoin matenek tebes” Sek Asok dehan.
Iha selebrasaun loron mundial ba Ema ho Difisiensia iha Timor-Leste ne’ebé hala’o iha Munisipiu Covalima, hahu uluk ho misa iha Igreja Ave Maria Suai, depois misa remata Ministra Solidariedade Sosial no Inkluzaun Veronica das Dores, ne’ebé akompaña husi Sek Asok. Filomeno Cardoso, Komandante PNTL Munisípiu Covalima, Super-intendente Polisia, Calisto Gonzaga inklui dram Band husi Eskola Sekundaria Jeral Publika Suai no ema ho difisiensia sira la’o ain husi igreja to’o iha Edifisiu Sentru Solidariedade Sosial Munisipiu Covalima iha Aldeia Sukabi Laran, Suku Suai-Loro, Postu Administrativu Suai hodi selebra loron mundial ba EhD. Enkuantu iha selebrasaun ne’e ministra no autoridade sira iha Covalima apoiu mos ai han baziku ba ema ho difisiensia ho objetivu ida katak apoiu ne’e atu hodi sustenta ba sira moris iha loron ida ka rua nian, total ema ho difisiensia ne’eb’e partisipa iha komemorasaun loron mundial ne’e mai husi postu administrativu 7 kuaze ema na’in-70 resin, no tuir dadus provizoriu ema ho difisiensia iha munisipiu Covalima hamutuk ema na’in-2000 resin.
Jornalista : Julio Salinas
Editor : Chamot Nahac
