Covalima (RCCT) 28-12-24-Tinan 2024 Covalima liu husi Servisu Munisipal Aprovizionamentu finaliza ona prejetu Planu Dezenvolvimentu Integradu Munisipal (PDIM) ualu ne’ebé la konsege ezekuta iha tinan 2023, nune’e liu husi re-prakualifikasaun iha tinan ida ne’e, finalmente atinji duni rejultadu ne’ebé di’ak no benefisia ba komunidade sira.
Ho rejultadu ne’e maka sabadu ohin governu liu husi perzidente autrodade covalima hala’o observasaun no inaugura projetu hat ne’ebé finaliza ona mak hanesan, Konstrusaun Laboratoriu Sentru Saude Komunitariu iha Postu Administrativu Zumalai, Konstrusaun kanal Irigasaun husi Bauruaikun to’o Kulu Oan, konstrusaun edifisiu Eskola Baziku Filial (EBF) Matai, no Konstrusaun Moru no Armajen, Paving Grajen no uma Seguransa iha Edifisiu Servisu Munisipal Obras Publiku (SMOP).
“Liu husi prosesu Aprovizionamentu halo ona Projetu ualu, Projetu ualu ne’ebé mak ami la’o prosesu tomak, ami tarde ituan tanba iha re-prakualifikasaun, re-prakualifikasaun akontese tanba administrador sesante ho diretór sesante sira iha prosesu 2023 seidauk finaliza ba prakualifikasaun, tanba ida ne’e mak ita halo re-prakualifikasaun maibe konsege ita remata hodi nune’e ita la’o ona obra ualu no ohin loron projetu hat mak halo ona Observasaun no inaugura” Prezidente Autoridade Munisipiu (PAM) Covalima, Miguel Armada Cardoso “Razão” Informa.
Prezidente Autoridade Munisipiu (PAM) Covalima, Miguel Armada Cardoso “Razão” konsidera obra husi projetu hat ne’ebé inaugural ona iha kualidade ne’ebé di’ak no dadaun ne’e intrega ona ba governu liu Autoridade Munisipiu Covalima hodi bele halo jestaun.
“Halo Observa ba Prozeitu hat; Primeiru mak Projetu SSK Zumalai, segundu mak irigasaun iha Kulu Oan, terseiru mak uma eskola ida iha Matai, mos ikus liu iha Obras public Moru haleu no Uma Rua mak Armajen ki’ik ida no uma Seguransa, remata ho kualidade ne’ebé mak ita hotu hotu kontenti, maske iha fulan tolu deit obra hirak ne’e ezekuta, konsege finaliza ona, projetu hat ne’e sira intrega ona iha Munisipiu hodi Estadu mak halo jestaun” Tenik Razão.
Projetu Hat husi PDIM ualu 2024 nian ne’ebé dadaun ne’e sei iha prosesu konstrusaun mak hanesan, Konstrusuan Salaun Postu Administrativu Fohorem, Postu Saude Nainare iha Suku Holpilat, Sitiu Turistiku Lakirin Postu Administrativu Maukatar, no mos Mekadu Beko Postu Administrativu Suai.
Entretantu iha atividade observasaun ba projeitu PDIM ualu ne’ebé ohin inagura ona projetu hat ne’e, Prezidente Autoridade Munisipiu Covalima hetan akompañiamentu husi Diretór Jeral SEATOU, Inspetor Jeral MPRM, Reprezentante Sekretaria Estadu Dezelvolvimentu Lokal (SEDL), Diretór Jeral Simplifikasaun Modernizasaun Administrasaun Lokal (SMAL), Reprezentante Diretór Diresaun Nasionál ba Servisu Organizasaun Urbana (DNSOU), Diretór Nasional Formasaun no koperasaun Nasional, Sekretaria Munisipal Planeamentu Investementu no Dezenvolvimentu Integradu, Diretór Obras Publiku Munisipiu Covalima, Diretór Servisu Munisipal Planeamentu Integradu no Dezenvolvimentu Covalima, Diretóra Finansas Munisipiu Covalima, inklui funsionariu sira.
Jornalista:Moichung
Editor : Chamot Nahac
