Covalima (RCCT) 25-04-25- Sekretaria Estadu Veteranu hamutuk no Autoridade Munisipuiu Covalima hahu halo identifikasaun ba rai iha Aldeia Dais, Suku Belekasak hektares sanulu (10) atu utiliza harii Jardim Dos Herois Iha Munisipiu Covalima nune’e bele halot restus mortais hamotuk 778 ne’ebé durante ne’e rai hela iha uma mahon maukatar.
Sekretariu Estadu Veteranu, Cesar dos Santos da Silva, dehan rai ne’ebé idetifika no halo ona leventamentu dadus ho medida luan medida metro 203 no naruk ho medida metru 492.
Notisia relevente : https://www.rcct.tl/governu-preve-osan-rihun-atus-hat-resin-hodi-harii-jardim-dos-herois-iha-covalima/
“Ohin ho ha’u nia ekipa diretór jeral mai husi nasional halo uluk enkontru ho konsellu Veteranu Munisipiu ninia involve mos zona na’in-2 husi Maukatar nian inklui Sekretariu Munisipal Planeamentu Investimentu no Dezenvolvimentu Integradu, konsellu Veteranu Covalima, Diretór Terras Propeidade Covalima, hafoin remata enkontru kontinua mai identifika rai para estabelese Jardim Dos Herois hodi hakoi restu mortais ne’ebe halibur hela iha uma mahon Maukatar no uma mahon Lokeu total 778, uluk iha IV governu konstituisional estabelese duni fatin ne’e, no halo ona Gapura no moru maibe kondisaun ikus hatudu katak ida ne’eba ita labele tanba aban bainrua mosu erosaun rai halai restu mortais rai bele hakoi lakon, tan ne’e maka preokupasaun husi Ministeriu nian mai buka nafatin liu husi konsellu hodi kordena sekretaria zona sira husi Maukatar identifika fali rai foun ida hodi estabelese Jardim ne’e” informa Sekretariu Estadu Veteranu Cesar dos Santos da Silva, ba RCCT iha Aldeia Dais, Kinta (24/04).
Governante ne’e afirma liu husi enkontru, identifika fatin rua, maibe hafoin tun ba iha terenu hodi identifika, konsege deside rai dais mak sai propriedade ba estabelesementu Jardim dos Herois.
“Liu husi enkontru ida ohin deside rai iha Dais ne’e maka rai estadu nian ne’ebé uluk iha okupasaun Indonezia hodi harii uma bolu ho lian Indonezia dehan Rumah Sangat Sederhana (RSS) ne’ebé agora abandonado hela, ne’e maka ami hamutuk ho diretór Terras Munisipiu Covalima nian mai identifika kedas fatin refere, rai iha ne’e sei utiliza ho luan medida metro 203, naruk ho medida metru 492, hamutuk hektares 10” nia haktuir.
Enkuantu tuir Sekretariu Estadu Veteranu Cesar dos Santos da Silva dehan antes ne’e harii ona Jardim Dos Herois Iha Lokeu, Suku Ogues, Postu Maukatar, maibe ikus mai liu husi Ministeriu Asuntu Veteranu nian identifika katak fatin refere la seguru atu utiliza hodi haloot restu mortais sira, tan ne’e maka identifika fali rai estadu nian iha Dais hodi bele estabelese fali Jardim Dos Herois.
Jornalista : Julio Salinas
Editor : Chamot Nahac
