Covalima (RCCT) 25-04-25- Governu liu husi Ministeriu Asuntu Kombatentes Libertasaun Nasional provee orsamentu ho montante Dolar Amerikanu Rihun atus hat resin harii Jardim Dos Herois iha Covalima nune’e hodi bele haloot restu mortais sira ne’ebé halibur ona no dadaun ne’e tau hela iha uma Mahon Maukatar hamutuk 778.
Sekretariu Estadu Veteranu Cesar dos Santos da Silva, hatete, molok ne’e governu iha planu atu haru jardim ba erroi sira iha Lo’okeu, Suku Debos, maibe tanba kondisaun terrenu la faboreval mak governu liu husi Munisteriu Asuntu Kombatente Libertasaun Nasional hamotuk ho Autoridade no Veteranu sira iha Covalima idetifika fali fatin seluk mak iha Dais hodi halo konstrusaun Jardim ba Erroi sira.
“Ami Preve hela orsamentu atu hodi hala’o hela iha Lokeu maibe kondisaun terenu hatudu ladun faborese ne’e maka orsamentu ne’e ami kaer hela hodi identifika fatin seluk para hala’o konstrusaun ne’e, orsamentu ne’ebe ami ho montante hamutuk dolar Amerika Rihun atus hat resin” informa Sekretariu Estadu Veteranu Cesar dos Santos da Silva, ba RCCT iha Aldeia Dais, Kinta (24/04).
Sekretariu Estadu ba Asuntu Veteranu mos preokupa tenki implementa lalais konstrusaun Jardim ba Errois sira iha Covalima molok tama ba doluk.
“Tanba ne’e ami preokupa uitoan, tanba tama ona segundu trimestral, lakleur tan ba terseiru trimestral, kuandu terseiru trimestral maka la implementa signifikan katak Osan ne’e sei Fila fali ba estadu, kuandu tama ona ba kofer estadu dala ruma problema tan ami bele halo fali pedidu ou governu sentral labele aprova tan pedidu Ida ne’e, tanba ne’e maka ami hakarak lalais para orsamentu rihun atus hat resin, iha ami nia liman ne’e hala’o dadaun konstrusaun para aban bainrua sai jardim dos Herois definitivu iha Covalima, refere liu iha Postu Maukatar, tanba Postu Administrativu Maukatar maka halibur ona restu mortais 778” Nia informa.
Enkuantu Sekretariu Estadu Veteranu Cesar dos Santos da Silva relata tuir planu Ministeriu nian tenki harii Jardim Dos Herois Iha tinan ida ne’e Nia laran, maibe sei hare mos kestaun administrativu husi Terras no Priodidade konaba atribuisaun titlu ba rai, para nune’e tekniku sira bele halo ona survey no kontinua kedas ho konstrusaun.
Jornalista : Julio Salinas
Editor : Chamot Nahac
