Covalima (RCCT) 07-01-25-Florindo do Carmo, nudar ema edukador ida iha munisipiu covalima, enkoraza estudante foun hamutuk na’in 540 iha Eskola Sekundaria Jeral Publika (ESGP-Sigla Portuguesa) Suai, atu aproveita oportunidade ensinu sekundaria hodi sai ema matenek ne’ebé iha valor bo’ot ba futuru nasaun RDTL.
Florindo do Carmo hato’o lia hirak ne’e hafoin reprezenta Diretóra Servisu Munisipal Edukasaun Munisipiu Covalima fo palestra ba estudante foun hamutuk ema na’in-540 ne’ebé tuir orientasaun iha ESGP Suai.
“Husu ba ha’u nia oan sira mai husi fatin ne’ebé la hanesan, mai husi fatin ne’ebé kapasidade inan aman la hanesan, mai ho intensaun la hanesan, husu fabor imi mai atu aproveita, ha’u fo lia tatian ida katak husi Postu Fatululik, Maukatar husi fatin hotu-hotu mai iha ne’e mai hodi beik, mai hodi ki’ak, mai hodi beik atu aproveita buat ruma iha fatin ida ne’e, mai lori ki’ak atu aproveita buat ruma iha fatin ida ne’e, labele mai ho riku no labele mai ho matenek, kuandu mai ho riku berfoia, lakohi tama eskola lori motor halai tun sa’e, ezame laliu profesor sira maka sala, ita tenki refleta ita nia an, hadi’a ita nia an, tanba futuru agora iha imi nia liman, mai ho ki’ak fila ba ho matenek bele aproveita ona riku soin mundu nian” nia informa.
Nia mos konta istoria pasadu ba estudante foun sira katak tempu agora edukasuan mak buka ema atu eskola kompara ho pasadu ema ne’ebé inan aman iha osan mak ba buka eskola to’o iha dili, maibe ida ne’ebé inan aman la iha kbit maka ninia oan sira sei labele asesu ba edukasaun ho dignu.
“Eskola ida agora ne’e, eskola maka mai buka imi la hanesan ami uluk ami maka buka eskola secundariu jeral ami ba buka iha Dili, mais imi agora lae eskola maka mai buka imi, imi tenke aproveita didi’ak, se la aproveita aban bainrua imi maka sei arepemde imi nia moris, iha biban ne’e mos lori edukasaun Covalima nia naran hakraik an husu nafatin ba profesor sira atu hare ita nia oan sira lubuk ida maka mai eskola iha fatin ida ne’e hare hanesan labele hela ida hodi ida” nia dehan.
Florindo do Carmo husu estudante hotu hotu tenki aproveita oportunidade hodi aprende iha eskola nudar bukae hodi fo kontenti ba inan no aman sira no mos bele sai juven ida ne’ebé vale iha nasaun timor leste.
Jornalista : Julio Salinas
Editor : Chamot Nahac
