Covalima (RCCT) 24-10-23-Kandidatura Xefe Lalawa, Maria Fienelda kompromete karik iha eleisaun suku ba periodu 2023-2030 maka povu fo fiar hodi eleitu maka sei dezenvolve setor agrikultura iha Suku Lalawa liu husi forma grupu ho joven sira.
Maria Fianelda hatete karik eleitu sei servisu hamutuk ho joven sira hodi hadi’a uluk setor agrikultura.
“Se karik ha’u eleitu iha periodu ida ne’e buat barak maka ha’u sei halo, liliu sei hadi’a fila fali buat hirak ne’ebé durante ha’u haree lao ladun diak iha suku laran maka setor agrikultura nian, tan ne’e karik eleitu sei hadi’a liu ba iha setor agrikultura liu husi forma grupu hodi involve hotu joven feto no mane iha suku laran, tanba iha parte ida mos ita haree iha suku laran maioria komunidade moris ho vida agrikultor” nia dehan.
Fianelda subliña karik eleitu sei buka meus ida hodi halo proposta ba governu atu bele tau matan hadi’a estrada iha Lalawa atu nune’e bele fasilita komunidade lori sira nia produtu lokal asesu ba merkadu ho di’ak tanba durante tinan barak nia laran ona estrada iha Lalawa ladi’ak.
“Bainhira ha’u eleitu sei tau prioridade ida mos ba iha kondisaun estrada tanba iha tempu bai loro sente diak maibe tama ba tempu udan kondisaun estrada sae mai iha suku Lalawa araska tebes, tanba eleitu sei tenta ba governu oinsa atu bele hadi’a hodi fasilita komunidade halo viajen ba mai livre no sira bele lori sira nia produtu lokal asesu ba iha merkadu ho diak liu tan” nia haktuir.
Maria Fienelda hatete durante ne’e nia parte mos observa atividade iha laran la’o ladun di’ak tan ne’e motiva nia hodi kandidata ba Suku Lalawa hodi kompete ho kandidatu sira seluk ba iha eleisaun suku ba periodu 2023-2030.
“ha’u hakarak kandidata ba suku iha buat rua mak motiva ha’u, primeiru ha’u hanesan feto ida hakarak mos atu sai hanesan feto maluk sira ne’ebé durante ne’e servisu bele lidera, sira bele fasilita ne’e ha’u hanesan tertarik liu ba ida ne’e, tan ne’e mak ha’u hanesan feto hakarak promove ha’u nia an katak ha’u mos bele, iha parte seluk ha’u haree iha ami nia suku faillansu barak mosu durante ne’e iha suku laran liliu programa barak la la’o, tan ne’e ha’u iha hanoin ruma se karik aban bainrua iha oportunidade ha’u mak sai xefe suku ha’u hakarak hadi’a buat barak iha suku laran ne’e” nia dehan.
Entertantu Maria Fienelda moris iha Suku Lalawa, Postu Administrativu Tilomar, Munisipiu Covalima kandidata ba suku periodu 2023-2030 mai ho programa 4 mak hanesan haforsa setor agrikultura ba komunidade agrikultor liu husi hasa’e produsaun iha to’os no natar, halibur no anima joven feto no mane no mos grupu kategoria seluk ne’ebé organizadu liu husi atividade hasa’e rendimentu ekonomia, sai ponte hodi kria servisu hamotuk entre estadu, kultura no igreja hodi kria korente unidade no paz iha komunidade no ida ikus liu maka ezekuta programa hotu iha prinsipiu transparansia.
Editor : Chamot Nahac
