Covalima (RCCT) 04-07-25-Sekretariu Estadu Floresta Fernandinho Vieira, rekuñese Nonu Governu hala’o ona mandate durante tinan rua maibe seidauk halo buat barak ba povu no rai ida ne’e, maske nune’e governasaun ne’ebé lidera husi Primeiru Ministru (PM) Kay Rala Xanana Gusmão ne’e iha esperasaun bo’ot katak durante mandate tinan lima sei halo dezenvolvimentu ba ne’ebé fo benefisiu ba povu timor leste.
“Iha fulan ida ne’e nia laran ita kompleta tinan rua ba iha governasaun ida ne’e, tanba ne’e maka durante tinan rua ha’u sente katak buat barak maka governu ida ne’e seidauk bele halo, maibe ita iha esperansa nafatin katak imi reja nafatin, fo esperansa nafatin, fo fiar nafatin ba governante sira durante mandatu tinan lima nia laran ne’e sira sei halo buat ruma ba rai doben ida ne’e, ne’ebé ita agradese tanba depois de ita ukun-an tama ona ba tinan 20 resin povu barak maka seidauk hetan benefisiu husi ukun rasik-an id ne’e” Sekretariu Estadu Floresta Fernandinho Vieira, deklaran ba povu sira iha Postu Administrativu Zumalai, Munisipiu Covalima.
Governante ne’e deklara governu da sia lideradu Primeiru Ministru Kay Rala Xanana Gusmão iha kompremisiu atu hala’o dezenvolvmimentu hodi hadi’a povu nia moris iha era ukun-an ida ne’e.
“Nonu governu konstituisional ida ne’e lidera husi Maun Bo’ot Kay Rala Xanana Gusmão, iha hanoin tomak oinsa para atu bele hadi’a povu nia moris liu husi objetivu ukun rasik-an ida ne’e, tanba ne’e ha’u mos hanesan parte husi governante ida ne’e, ha’u sente katak servisu ne’e todan, servisu ne’e todan ne’e la’os tanba servisu ida ha’u kaer ne’e, maibe tempu ne’ebé maka ita fahe lato’o, iha sabadu ho domingu mos ita tenke servisu, ida ne’e maka sente todan, problema oi-oin mosu iha ita nia oin, maibe tanba fiar ne’ebé povu fo mai ita tenke hakatak nafatin ba oin hodi servi ita nia rai no nasaun ida ne’e” governante ne’e. deklara.
Maibe tuir Sekretariu Estadu Floresta Fernandinho Vieira, optimista molok governu da sia termina mandate, sei halo dezenvolvimentu ida ne’ebé benesia ba povu timor leste.
Jornalista : Julio Salinas
Editor : Chamot Nahac
