Covalima (RCCT) 21-02-23—Amo Paroko igreja Ave Maria Suai, Sebastião Eugenio da Cruz Corea, hatete eleisaun parlamentar besik ona partidu politiku sira komesa la’o tama sai aldeia, suku hala’o konsolidasaun, tanba ne’e husu sarani sira tenke kria Paz no estabilidade hodi simu partidu hotu bainhira hato’o sira nia programa liu husi konsolidasaun bairo ka suku laran.
“Hanesan foin lalais iha Domingu iha misa ne’e ha’u hato’o ba sarani sira katak agora iha konsolidasaun partidu oi oin komesa la’o tama sai suku, ita tenke simu bainhira sira ba, tanba ita ba hakarak atu rona sira nia programa, maibe ita ba rona tenke hatene katak ita mesak Timor oan, tan ne’e partidu sese deit ita sarani sira simu deit hodi rona buat saida mak sira aprezenta, ne’e duni ita tenke kria ambiente hakmatek iha fatin para eleisaun parlamentar mai ne’e bele la’o ho di’ak” informa Padre Paroko Ave Maria Suai, Sebastião Eugenio da Cruz Corea, ba jornalista sira iha salaun enkontru Igreja Ave Maria Suai, Tersa (21/02).
Amo paroko afirma partidu politiku agora sira halo konsolida hodi hein ba kampana eleitoral mai, nune’e amo paroko tatoli lia ba sarani sira atu mantein paz no estabilidade iha rai Suai.
“Tanba estabilidade iha maka dezenvolvimentu bele iha, estabilidade iha ita la’o ba ne’ebe deit la’o livre, estabilidade iha ita hakarak atu hala’o atividade negosiu saida deit bele halo tan ne’e hein katak kampana mai partidu oi-oin mai ita ba rona deit no kria nafatin estabilidade, la’os ba rona tiha programa partidu A nian fila mai hodi hatun fali partidu B nian ne’e labele hanesan sarani ba rona to’o ona loron eleisaun ida-idak ba to’o iha sentru votasaun tama ba vota tuir ida-idak nia konsiensia rasik” Amo Paroko dehan.
Amo paroko afirma tuir observasaun uma kreda nian lider partidu politiku sira iha konsolidasaun ka kampanya eleitoral sira insulta malu, tanba atu hodi hadau votu maibe iha kotuk hakuak malu no hamnasa ida ne’e mak presiza hatene labele monu ba lasu lider partidu sira insulta malu ne’e.
Amo Sebastião Dehan lei laharuka líder partidu Sira insulta malu iha tempu kampanha, maibe atu ganha votu busi eleitor Sira Mak líder partidu politiku Uja meiu insulta malu iha tempu halo kampanya.
“Iha lider partidu politiku balu mai ho ha’u ko’alia dehan amo ami sira maka tama iha partidu politik ne’e ohin ami bele dehan metan aban bele dehan mutin, maibe amo sira lae metan, metan to’o mate, mutin ona mutin to’o mate, ami sira ne’e ohin bele dehan A aban bele dehan B tanba ami halo politika atu dada ema hodi hetan votus, ohin ami bele insulta malu aban ami bele hakuak malu” Amo Paroko konta.
Amo Paroko haktuir nudar sarani ko’alia sukat ibun maske nanal ruin laiha, maibe tenke hatene katak ema mak ko’alia, ne’e duni ko’alia labele estraga fali ema seluk hodi kria problema, hodi destroi unidade, maibe nudar sarani lia fuan ko’alia atu hametin unidade, tanba ne’e ko’alia sukat.
Jornalista : JS
Editor : CN
