Covalima (RCCT) 15-08-2026-Institutu Nasional Saude Publika Timor-Leste (INSPTL) realiza formasaun dizitalizasaun literasia primeiru vez iha Munisipiu Covalima hodi hasa’e kuñesimentu ba pessoal saude sira.
Iha formasaun dizitalizasaun literasia ida ne’e husi INSPTL fo formasaun iha parte rua mak hanesan Online no Ofline, iha parte Online nian sira uza plataforma Zoom Meeting hodi akresenta informasaun literasia sobre Saude Publika nian, no parte Ofline hanesan transmiti informasaun direita ba iha pessoal saude Munisipiu Covalima.
Diretor Nasional Formasaun INSPTL Amelito Gomes hateten iha formasaun ne’e ami foku liu ba iha programa lima mak hanesan Kuidadu Ante Natal Care, Intra-Partu, Post Natal, Kuidadu ba Bebe Moris no Akonsellamentu ba Planeamentu Familiar materia sira ne’e ami realiza formasaun durante loron lima.
Materia hirak ne’ebe mak durante loron lima ne’e formador sira fo ba iha formando sira iha teoria no halo sira mos hala’o iha pratika iha Centru Saude sira ne’ebe mak besik iha fatin formasaun nian, ita hatene katak formasaun ida ne’e ita iha ona pessoal saude sira iha ona kuñesimentu ba iha area lima ne’ebe ami fo formasaun ba sira ne’e, maibe ita presija atu kapasita kapasita tan hodi eleva tan sira nia kuñesimentu nune’e iha pratika iha implementasaun ba servisu saida mak sira hetan durante loron lima ne’e hanesan atu apoiu tan sira nia abilidade iha sira nia servisu fatin nu’udar pessoal saude ida, Amelito Gomes, relata.
Formando Jubelino D.C. da Costa hanesan pessoal Saude ida sente orgollu tanba formasaun ba Dizitalizasaun Literasia ida ne’e pela primeira vez hodi kapasita kuñesimentu ba materia refere oinsa atu implementa iha Centru Saude sira.
Oportunidade ida ne’e hanesan osan mean ida tanba iha Munisipiu Covalima ida ne’e sai hanesan primeira vez ami hetan formasaun ne’ebe mak liu husi modelu Dizitalizasaun nian liu liu ba iha materia ne’ebe mak ami simu durante loron lima ami sente satisfas tebes tanba ita hare ba tema jeral liga liu ba iha Saude Inan no Oan tanba loos duni katak ami iha ona kuñesimentu konaba formasaun Dizitalizasaun Literasia Online loron rua no Ofline loron tolu, Jubelino D.C. da Costa, relata.
Programa Formasaun Dizitalizasaun Literasia ida ne’e realiza durante loron lima iha salaun Domin Suai, no partisipa husi Formando 30 resin mai husi Postu Saude postu administrativu hitu iha Munisipiu Covalima.
Jornalista Paul Mandeu
