Prezidente Komisaun Regulador Arte Marsiais (KRAM) Timor-Leste Octavio da Conceicão hatete hala’o re-fiskalizasaun ba ranting organizasaun arte marsiais sira ne’ebé ejiste iha Covalima ne’e atu identifka no garatia ranting sira kumpri rekizistus husi segundu dirativa nian.

“Nonu governu konstituisional liu husi Ministeriu Juventude Deportu Arte no Kultura hamutuk ho Ministeriu Interior liu husi Komando PNTL inklui instituisaun estadu tomak ne’ebe tau matan ba area seguransa nian haktuir ba rezolusaun Nu. 45/2023 10 de Novembru, ohin ami mai iha Covalima hodi halo refiskalizasaun ba atividades treinamentu arte marsiais ba sentru lubuk no eskola hotu-hotu ne’ebe destina ba pratika organizasaun arte marsiais hotu iha Covalima, objetivu husi ida ne’e atu identifika loloos ranting sira ne’ebe sira hala’o haktuir ona ba segundu diretiva KRAM no halo tuir rezolusaun Nu. 45/2023 10 de Novembru kona ba nain ba rai hodi harii ranting atu nune’e KRAM halo relatoriu hodi aprezenta ba Konsellu Ministru” informa Prezidente Komisaun Regulador Arte Marsiais (KRAM) Timor-Leste Octavio da Conceicão ba RCCT hafoin hala’o refiskalizasaun ba ranting sira iha Covalima Sesta (08/12/23).

Nia afirma, re-fiskalizasaun ne’e realiza tanba haktuir husi rezolusaun Numeru. 45/2023 10 de Novembru fo loron 90 ba KRAM no PNTL atu halo identifikasaun ba fatin treinamentu sira ne’ebé la ses husi organizasaun arte marsiais sira iha Covalima.

“Servisu ida ne’e introdus mos iha rezolusaun rezolusaun Nu. 45/2023 10 de Novembru katak fo 90 dias ka fulan tolu ba KRAM no PNTL halo identifikasaun ba fatin treinamentu sira, maibe mos identifkasaun ka servisu sira ne’e la ses husi lider organizasaun arte marsiais treinadores sira iha sentru formasaun sira hotu iha Covalima ne’ebe iha parte Zumalai nian ohin ranting ka sub-ranting husi organizasaun tolu hanesan PSHT, IKS-PTL no KORK kuaze besik 20 ona maka ami vizita, tan ne’e bainhira remata ami sei hato’o relatoriu ba iha MJDAK hodi aprezenta ba Konsellu Ministru” nia dehan.

Entertantu KRAM no PNTL hala’o re-fiskalizasaun durante loron hat hahu Sesta semana ne’e. hahu uluk husi Postu Administrativu Zumalai, no iha loron Sabadu, Domingu no Segunda kontinua hala’o refiskalizasaun iha Postu Suai, Maukatar no Tilomar ba organizasaun Arte Marsiais sira hanesan IKS-PTL, KORK no PSHT tuir rezolusaun Nu. 45/2023 10 de Novembru.

Jornalista : Julio Salinas

Editor       : Chamot Nahac