Covalima RCCT 05-04-24-Tuir dadus komulativu ne’ebé Servisu Saude Munisipiu Covalima deteta hahu husi tinan 2012 to’o 2024 iha guarter primeiru nian konsege rejista kazu positivu HIV/Sida iha Covalima hamutuk 83, husi numeru kazu hirak ne’e maioria afeta ba ema ho idade produtivu.

Kordenador Programa HIV/SIDA Munisipiu Covalima, João Ramalho relata, tuir dadus komulativu teritoriu nasional Munisipiu Covalima hetan terseiru lugar ba kazu HIV/Sida, ho pasiente ema na’in-83 afeta ba moras at ida ne’e.

“Hanesan ita hotu hatene katak dadus komulativu entre Timor laran ne’e sai numeru primeiru Dili ba moras HIV/Sida, segundu Bobonaro no terseiru lugar maka Covalima, tuir dadus komulativu ne’ebé ita deteta husi tinan 2012 ate 2024 tama ba iha Quarter primeiru ita konsege deteta iha inisiu kazu 83, entre kazu 83 ne’e kompostu husi mane 51, feto 32 pesoas, husi ema na’in-83 ita haree fali ba idade maioria idade produtivu ne’e maka pursentu as liu husi tinan 15 to’o 44, husi idade produtivu ne’e afeta ba ema na’in-58” informa Kordenador Programa HIV/SIDA Munisipiu Covalima, João Ramalho ba jornalista sira iha nia knar fatin Servisu Saude Munisipiu Covalima Ladi Kamanasa Kinta (04/04).

João Ramalho, haktuir pasiente sira HIV/SIDA ho idade produtivu rejista barak liu iha tinan 2019 ho 2022, ne’ebé maioria husi Postu Administrativu Suai ho numeru pasiente mane na’in 9 no feto nain 18, segundu Tilomar tuir fali maka Maukatar, maibe ba postu sira seluk rejista ho numeru pasiente ladun ladun barak.

“Pasiente sira ne’e ita haree ba tinan karik rejista barak liu iha tinan 2019 ho 2022, iha tinan 2019 ita rejista kazu positivu HIV/SIDA hamutuk 19, iha tinan 2022 ita rejista kazu 10 no iha tinan sira seluk ne’e rejista kazu 9 ba kraik, iha Postu Suai maka maioria, depois segundu maka Postu Tilomar, terseiru Maukatar, tuir fali Fatumea, Zumalai, Fatululik no Fohorem, iha Postu Administrativu Suai okupa primeiru lugar ho numeru pasiente HIV/Sida kompostu husi mane na’in-9 mane na’in-18, Tilomar iha pasiente na’in-18, kompostu husi mane na’in-10 feto na’in-8, iha Maukatar total ema na’in-14 kompostu husi mane 9 feto 5” nia dehan.

Entertantu husi numeru pasiente sira ne’ebé iha oras ne’e daudaun iha pasiente na’in-27 mate ona no agora hela de’it pasiente na’in-30 maka agora halo hela tratamentu iha ospital Referal Suai.