COVALIMA—–Serbisu Jestaun Merkado no Turismu Munisipiu Covalima (SJMTMC) Kinta (25/05) ho ekipa kompostu husi seguransa sivil, Terras Propriedade munisipiu, polisia tranzitu tun direita ba iha Merkadu Debos, Suai hodi obrigatoriu muda vendedores sira ne’ebe fa’an sasan iha dalan halo sosa na’in liu ba mai ladiak iha merkadu laran.
Diretór Serbisu Jestaun Merkado no Turismu Munisipiu Covalima (SJMTMC), Vitorinho do Carmo, hatete objetivu muda vendedor sira ne’ebe durante ne’e fa’an sasan taka dalan hodi la fo espasu ida ne’ebe diak ba ema hakarak atu mai sosa sira nia sasan iha merkadu ida ne’e.
“Objetivu ita nian ohin mai ne’e hakarak atu hasai vendedor sira ne’ebe taka dalan ho oda ne’ebe toba iha merkadu, objetivu ida ne’e ita muda tanba merkadu ne’e fatin negosiu, laos mai uza fali hodi taka dalan halo ema lao ba mai atu sosa sasan sira mos lao ladiak hotu ida ne’e ita lakohi” informa Diretór Serbisu Jestaun Merkado no Turismu Munisipiu Covalima (SJMTMC), Vitorinho do Carmo, ba RCCT iha Merkadu Debos, Kinta (25/05).
Nia haktuir merkadu fatin negosiu, ne’ebe atu halo negosiu ba produtu oi-oin iha ne’e labele mai uza fatin ne’e hodi toba okupa fali dalan hodi fa’an sasan ba maibe fatin ida ne’ebe fa’an sasan fatin ne’e uza ba toba fatin ne’e labele.
Nia afirma atu buat sira ne’e labele akontese ba futuru maka ekipa ida ne’e tun mai iha merkadu Debos hodi muda vendedor sira labele kontinua fa’an ida dalan liliu iha merkadu laran.
“Tanba ida ne’e maka ita halo jestaun ba fatin sira ne’e, atu sira ne’ebe hela iha merkadu laran, labele hela iha merkadu laran, sira taka dalan tenke ses husi dalan ne’e para ema komprador sira lao ba mai livre, nune’e mos bainhirq mosu insendiu ruma mosu iha merkadu kareta Bombeiros nian bele tama hodi halo atuasaun ba insendiu ne’e” nia dehan.
Vitorinho afirma fo prazu ba vendedor durante fulan ida nia laran ne’e ekipa tenke kontinua tanba muda ema nia mentalidade iha loron ida ka rua deit ne’e susar.
Nia dehan alende muda vendedor ba iha merkado laran ekipa ne’e halo mos sosializasaun kona-ba dekretu lei No. 19/2004, dekretu lei No.23/2009 no dekretu lei No.24/11 ho rejimentu MTCI nian No.5 kona-ba atu hadi’a halo jestaun ba iha merkadu.
Nia sublina kuandu vendedor sira la kompri maka sei foti medida tuir deklretu lei ne’ebe maka vigora ona nasaun demokratiku ida ne’e.
“Kuandu sira la kumpri beibeik ita sei foti medidas tuir dekretu lei No.23 no tuir deklretu lei No. 24 ida ne’e ita sei aplika tanba iha dekretu lei No.23/2009 ida ne’e kona-ba atu halo atuasaun ba ema ne’ebe komete iregularidade, ne’e fo tempu ba loron 180 deit, dekretu lei No.24/2011 ne’e atu fo sansaun, se karik, se maka taka permanente liu loron 180 nia sei hetan multa dolar Amerikanu rihun ida ($ 1000) buat sira ne’e hotu ita sei aplika tuir lei ne’ebe iha” nia informa.(Azu)
