Iha limpeza ne’e, Sekretariu Munisipal Planeamentu Asuntu Investimentu no Dezenvolvimentu Integradu Munisipiu Covalima, Caetano dos Santos Ribeiro, informa planu loke dalan foun ho objetivu ida atu hadi’a ekonomia komunidade nian, parte seluk maka redus asidente liliu ba movimentasaun ema la’o ain no kareta ho motor tama no sai iha merkadu laran.
“Planu atu loke dalan foun ne’e inisia husi governu anterior kedas, liu husi servisu obras no Planu Dezenvolvimentu Integradu Munisipiu (PDIM) mai halo kordenasaun ho komunidade sira iha ne’e, soke la konsege hamoos hodi loke dalan ida ne’e, maibe mai iha mandatu nonu governu ami hanoin katak loke dalan foun ida ne’e fo benefisiu ba ita nia komunidade sira hodi hadi’a sira nia ekonomia familia, tanba loke ona estrada iha estrada sorin-sorin komunidade bele harii sira nia uma ki’ik hodi loke sira nia kios, ita primeiru loke uluk dalan foun ida ne’e, tanba dalan ida ne’e asesu mai merkadu Ladi ne’e ida de’it,” dehan Sekretariu Munisipal Planeamentu Investimentu no Dezenvolvimentu Integradu Munisipiu Covalima, Caetano dos Santos Ribeiro.
Diretór Sevisu Munisipal Obras Publika no Transporte, Sidonio Gusmão, hatete komunidade rasik maka oferese rai hodi loke estrada foun.
“Komunidade sira entrega rai para halo konstrusaun, tanba estrada ne’ebé governu halo konstrusaun komunidae maka sei asesu, ema hotu mos sei asesu merkadu ne’ebé maka koloka iha Tua Derek, Aldeia Ailok Laran, Suku Kamanasa, tanba ne’e maka ohin mobiliza ita nia funsionariu sira ne’ebé orienta husi Prezidente Autoridade Munisipiu katak funsionariu hotu tenke halo limpeza ba iha loke estrada foun hahu husi Avenida Antonio Mendonça “Lesu Gatal” ba to’o merkadu Tua Derek Kamanasa, husi merkadu mai to’o iha Avenida Antonio Mendonca “Lesu Gatal” tabako Lot ne’e ho medida naruk metru 600, konaba medida estrada luan foin lalais ita halo sorumutu ho komunidade ne’e parte autoridade husu komunidade atu oferese rai metru 4, maibe komunidade rasik maka deside oferese rai metru 8 ba atu hodi halo estrada ne’e” nia dehan.
Servisu Munisipal Obras Perpara kondisaun no planu loke estrada foun ho luan metru 4, naruk metru 600, maibe komunidade rasik iha konsiensia oferese sira nia rai ho medida lua metru 8 hodi halo kontrusaun estrada foun ba merkadu suai ladi.
Entertantu partisipa iha limpeza jeral husi Sekretariu Munisipal Planeamentu Investimentu no Dezenvolvimentu Integradu (PIDI), Caetano dos Santos Ribeiro, Sekretariu Munisipal Asuntu Sosial no Organizasaun, Filomino Cardoso, Administrador Postu Administrativu (APA) Suai, Ildefonso Maria Amaral, Komandante Operasaun Autoridade Protesaun Sivil no Bombeirus, diretor servisu munisipal no delegasaun teritorial, PNTL munisipiu no F-FDTL destakadu iha Postu Administrativu Tilomar inklui funsionariu sira hotu.
Editor : Chamot Nahac
