Covalima (RCCT) 03-05-25-Administrador Postu Administrativu (APA) Suai, Ildefonso Maria Amaral manifesta Selebra Loron Mundial Liberdade Imprensa hanesan momentu ida ne’ebé lolos atu apresia papel importante imprensa nian iha sosiedade, nu’udar ai-riin ka pilar demokrasia nian, divulgador informasaun nian, no lian povu nian.
Autoridade Postu ne’e mos dehan Imprensa iha responsabilidade bo’ot atu kria sosiedade ida ne’ebé di’ak no informadu. Liuhusi notísia, artigu no reportajen investigativu
“Imprensa ajuda ita atu komprende mundu ne’ebé hale’u ita. Informasaun ne’ebé loos no konfiável maka baze ba desizaun hotu-hotu ne’ebé ita halo, tantu nu’udar ema ida-idak no nu’udar sosiedade.” Dehan APA Suai, Ildefonso Maria Amaral.
Nia mos dehan Liberdade Impresa la’os deit diretu jornalista sira nian maine ida ne’e diretu publiku nia atu hetan informasaun ida ne’ebé lolos, tan ne’e sosiedade hotu hotu atu tau atensaun hodi hakotu korenti dezafiu ne’ebé impresa hasoru konaba notisia falsu no sensura ne’ebé dadaun ne’e sai amesa ba Liberdade Imprensa.
“Agora daudaun, dezafiu sira ne’ebé mundu imprensa hasoru sai kompleksu ba beibeik. Notísia falsu, sensura, no ameasa ba liberdade espresaun mak asuntu sira ne’ebé ita presiza tau atensaun hamutuk. Ita tenke hanoin katak liberdade imprensa la’ós de’it direitu jornalista nian, maibé mós direitu públiku nian atu hetan informasaun ne’ebé loos no justu,
Tanba ne’e, iha Loron Mundiál Imprensa ida ne’e, mai ita hamutuk apoiu liberdade imprensa. Mai ita sensibiliza importánsia hosi mídia independente no responsavel. Ita presiza apoia jornalista sira iha liña oin, ne’ebé luta atu hateten lia-loos maski iha situasaun ne’ebé perigozu tebes.” APA Suai Kontinua.
Nune’e mos Autoridade Postu Suai ne’e husu ba Radio Komunidade Cova Taroman atu kontinua nafatin sai fonte importante hodi prevene Notísia falsu, sensura, ne’ebé agora daudaun, sai kompleksu no dezafiu ne’ebé mundu imprensa hasoru. Basa ameasa ba liberdade espresaun mak asuntu sira ne’ebé ema presiza tau atensaun hamutuk.
Engkuantu Prezidente Konsellu Radiu Komunidade Cova-Taroman dehan loron 3 fulan Maiu hanesan lembransa ba importansia liberdade imprensa nu’udar ai-riin ba demokrasia. Ho nune’e Radiu Komunidade hamriik atu hato’o lia-loos, diversidade, no lian povu nian, ne’ebé sei kontinua mantein espasu informasaun ne’ebé livre, onestu no responsavel ba komunidade sira.
Reportanzen : Chamot Nahac
