Covalima (RCCT), 12 Novembru 2026 — Juventude Postu Administrativu Maucatar, hamutuk ho komunidade no autoridade lokál, komemora Loron Nasional Juventude ba dala XXI no Loron Masakre Santa Cruz ba dala XXXV, ho tema jerál “Ho espíritu 12 Novembru nian, lori ita hamutuk ba harii pás no autoridade ba dezenvolvimentu sustentavel”, iha Postu Administrativu Maucatar, Munisípiu Covalima.
Komemorasaun ne’e sai hanesan momentu importante atu fó valor no dignidade ba luta juventude Timor-Leste iha tempu pasadu, ne’ebé ho espíritu nasionalizmu no patriotizmu hamutuk luta ba libertasaun Pátria.
Iha atividade ne’e, Administradór Postu Administrativu Maucatar, Laurentino de Jesus, hato’o mensajen kona-ba importánsia Loron Nasional Juventude no memória luta ba libertasaun Timor-Leste, liuliu atu juventude ohin loron komprende sakrifísiu jerasaun uluk nian.
“12 Novembru ne’e, hau nia oan sira, imi mak moris iha tinan 1999. Dalaruma imi la hatene, iha 12 Novembru, imi nia maun-alin sira uluk ne’e sakrifika an hodi ofrese an ba rai ida-ne’e, tanba hakarak rai ida-ne’e ukun rasik an. Ohin loron, hau nia oan sira uza farda ho bandeira Timor-Leste, la’ós buat ne’ebé ita sosa de’it, maibé sosa ho ran no ruin. Juventude sira mós ofrese sira-nia an tomak. La’ós veteranu sira de’it, maibé jerasaun ida ba jerasaun seluk kontinua hato’o luta ne’e to’o ohin loron,” dehan Laurentino de Jesus.
Nia mós subliña katak juventude iha papél importante nu’udar futuru ba dezenvolvimentu nasaun, no husu juventude sira atu prepara an, hamutuk no sai forsa ida hodi kontribui ba dezenvolvimentu iha Postu Administrativu hitu iha Munisípiu Covalima.
“Juventude mak futuru ba dezenvolvimentu iha rai ida-ne’e. Iha Postu Administrativu hitu iha Covalima, ita husu imi atu prepara an, oinsá atu halibur malu no sai forsa ida, tau hamutuk hodi dezenvolve rai ida-ne’e. Forsa ne’e mak hau nia oan juventude sira, ne’ebé ita ko’alia iha kontestu Loron 12 Novembru nian,” nia afirma.
Além husi mensajen no atividade komemorativa, organizadór sira mós prepara programa oioin atu hala’o iha ámbitu komemorasaun Loron Nasional Juventude ba dala XXI no Loron Masakre Santa Cruz ba dala XXXV iha Postu Administrativu Maucatar.
Programa hirak ne’e inklui semináriu, la’o ho obor, kalan reflesaun no kari ai-funan, nu’udar forma ida atu hametin memória istórika, valoriza sakrifísiu jerasaun uluk no transmite espíritu luta ba independénsia ba jerasaun foun.
Komemorasaun ne’e hanesan oportunidade atu juventude ohin loron kontinua valoriza istória luta ba independénsia, hametin unidade no assume responsabilidade atu kontribui ba harii pás no dezenvolvimentu sustentavel iha Timor-Leste.
Jornalista : J Correia
Editor : Paul Mandeu
