Covalima (RCCT), 05 Outubru 2026 — Hamutuk estudante finalista na’in 2.413 iha Munisípiu Covalima sei partisipa iha Ezame Nasional 2026, ne’ebé sei realiza iha loron 19 Outubru 2026.
Estudante finalista sira ne’e mai husi Eskola Sekundária Jerál Públika, Eskola Sekundária Tékniku-Vokasionál, Eskola Sekundária Katólika no eskola Ensinu Báziku sira ne’ebé eziste iha Munisípiu Covalima.
Xefi Departamentu Parque Eskolar, Beneditos Asa, relata katak preparasaun ba Ezame Nasional hahú husi prosesu rekolla dadus grella avaliasaun ba estudante finalista sira, ne’ebé hala’o iha etapa rua.
Nia esplika katak iha etapa dahuluk, grella avaliasaun ba trimestre dahuluk rekolla ona no rezultadu dadus sira-ne’e kanaliza ba Direksaun Nasionál Ministériu Edukasaun, parte Kuríkulu, iha fulan Juñu liubá.
Enkuantu iha etapa daruak, rekolla dadus realiza iha fulan Agostu, bazeia ba rezultadu ezame trimestre daruak, no prosesu rekolla dadus ne’e agora finaliza ona.
“Preparasaun ba Ezame Nasional 2026 ne’e hahú husi rekolla dadus grella avaliasaun ba finalista sira iha etapa rua. Etapa dahuluk, grella avaliasaun ba trimestre dahuluk rekolla no rezultadu dadus ne’e ami kanaliza ba Direksaun Nasionál Ministériu Edukasaun, parte Kuríkulu, iha fulan Juñu liubá. Depois, iha etapa daruak, ami rekolla dadus iha fulan Agostu ba ezame trimestre daruak, no dadus sira-ne’e finaliza ona,” Beneditos Asa hateten.
Nia hatutan katak iha nivel nasional, preparasaun agora foka ba pontu sira ne’ebé sei uza iha Ezame Nasional, inklui preparasaun kona-ba numeru nasional.
“Parte nasional, preparasaun hela ba premi iha pontus Ezame Nasional no mós halo preparasaun kona-ba numeru nasional, tanba Ezame Nasional ne’e sei realiza iha loron 19 Outubru 2026,” nia hatutan.
ESGP Filial Salele Prepara Estudante 120
Iha tempu hanesan, Koordenadór Eskola Paralela Salele, Deniel Cardoso, informa katak Eskola Sekundária Jerál Filial Salele iha estudante finalista hamutuk na’in 120.
Nia hateten katak estudante sira fahe ba programa CT, ho sala lima, no programa CSH, ho sala tolu, ho total sala hamutuk ualu.
“Total estudante husi Eskola Sekundária Jerál Filial Salele iha 120. Ba programa CT iha sala lima, no ba programa CSH iha sala tolu, ho total sala hamutuk ualu. Preparasaun iha tempu agora ne’e prontu, no ami tama ona ba etapa preparasaun ikus ba pontu ezame lokal,” Deniel Cardoso hateten.
Deniel Cardoso mós hateten katak eskola ne’e iha esperiénsia hala’o Ezame Nasional ba dala rua, no tinan ida-ne’e sei sai dala tolu. Tuir nia, to’o agora preparasaun la hasoru problema.
“Ita la iha problema tanba ita iha esperiénsia katak ita hetan ona Ezame Nasional ba dala rua, no tinan ida-ne’e ba dala tolu ona, ne’ebé la iha problema,” nia hateten.
Kona-ba fasilidade, Deniel Cardoso informa katak eskola hetan apoiu husi Ministériu Edukasaun ho meza no kadeira hamutuk 60, ne’ebé bele uza ba sala tolu. Ba sala sira seluk, eskola sei uza nafatin meza no kadeira ne’ebé iha ona.
Ba vijilánsia durante ezame, eskola prepara profesór vijilante hamutuk na’in 16, ho profesór na’in rua ba kada sala.
“Ami hetan ajuda husi Ministériu ba meza no kadeira hamutuk 60, bele garante uza ba sala tolu. Ba sala sira seluk, ami uza nafatin meza no kadeira ne’ebé mak tuan. Ami total vijilante profesór, tanba iha kada sala profesór na’in rua, ne’ebé bele dehan total profesór vijilante na’in 16,” Deniel Cardoso informa.
Distribuisaun Sentru no Estudante
Iha parte distribuisaun sentru ezame, Eskola Sekundária Jerál no Eskola Sekundária Katólika iha sentru Ezame Nasional hamutuk 7, ho estudante na’in 966, kompostu husi estudante feto na’in 545 no mane na’in 421.
Ba Eskola Sekundária Tékniku-Vokasionál, iha sentru Ezame Nasional hamutuk 3, ho estudante na’in 151, kompostu husi feto na’in 80 no mane na’in 71.
Enkuantu Ensinu Báziku iha sentru Ezame Nasional hamutuk 24, ho estudante na’in 1.296, kompostu husi feto na’in 634 no mane na’in 662.
Ho nune’e, total sentru Ezame Nasional iha Munisípiu Covalima hamutuk 34 sentru, ho estudante finalista na’in 2.413, kompostu husi estudante feto na’in 1.259 no mane na’in 1.154.
Ezame Nasional 2026 sei realiza iha loron 19 Outubru 2026.
Jornalista: J Correia
Editor: Paul Mandeu
