Covalima (RCCT) 17 Setembru 2026 — Komisaun Nasionál ba Eleisaun (CNE) hala’o atividade sosializasaun kona-ba lala’ok eleisaun no edukasaun sivika ba estudante sira husi Eskola CAFE, iha Munisípiu Covalima, hodi aumenta sira-nia komprensaun kona-ba demokrasia no partisipasaun iha prosesu eleitorál.
Komisáriu CNE Destakadu ba Munisípiu Ainaro-Covalima, Elvino Bonaparte do Rego, hatete katak atividade ne’e nia objetivu mak atu fahe informasaun ba estudante sira kona-ba importánsia partisipasaun iha “festa demokrasia” no komprende prosesu eleisaun.
“Ami hala’o programa edukasaun sivika ba alunu sira husi Eskola CAFE ho objetivu atu fahe informasaun, nune’e alunu sira komprende festa demokrasia no eleisaun ne’ebé sei akontese iha futuru,” Elvino Bonaparte do Rego informa.
Nia hatete katak edukasaun sivika importante atu estudante sira bele rona no analiza informasaun, foti desizaun no ezerse sira-nia direitu ho responsabilidade bainhira partisipa iha prosesu eleitorál.
Aleinde ne’e, CNE mós fó informasaun kona-ba Programa Recenseamentu Eleitorál Apoiu Base Dadus (REABD), ne’ebé hala’o ho apoiu husi STAE, atu ajuda sidadaun sira kumpri lei no rejista nu’udar eleitor, nune’e sira bele partisipa iha eleisaun ho di’ak no tuir prosedimentu ne’ebé determina.
Iha atividade ne’e, Reprezentante Administradór Postu Administrativu Suai, Vítor Gomes, enkoraja estudante sira atu kontinua fahe informasaun kona-ba lala’ok eleisaun ba inan-aman sira, hodi kontribui ba partisipasaun sidadaun iha prosesu eleitorál.
“Ha’u hakarak fó hanoin ba ita-boot sira kona-ba lala’ok eleisaun. Ita sei hasoru eleisaun no alunu sira-nia papél importante. Tanba ne’e, kontinua fahe informasaun kona-ba lala’ok eleisaun ba inan-aman sira atu sira partisipa másimu iha eleisaun,” Vítor Gomes enkoraja.
Atividade edukasaun sivika ne’ebé hala’o husi CNE ne’e espera bele aumenta estudante sira-nia komprensaun kona-ba demokrasia no lala’ok eleisaun, no enkoraja sira atu fahe informasaun ba inan-aman sira hodi kontribui ba partisipasaun sidadaun iha prosesu eleitorál.
Jornalista: Julião Correia
Editor: Paul Mandeu
