Covalima (RCCT) 11-06-25-Ministeriu Edukasaun hamutuk ho Autoridade Covalima no Embaxador Japaun ba Timor-Leste hala’o inagurasaun ba edifisiu Eskoka Basiku Filial (EBF) Harekain, ne’ebé konstrui husi husi fundu apoiu husi povu Japaun.
Reprezenta Ministeriu Edukasaun, Helio Lopes iha nia intervensaun rekuñese durante ne’e povu japaun apoiu bebeik ona setor edukasaun liu liu iha Infraestrutura liu husi halo konstrusaun sala de aula kuaze rihun ida resin oan.
“Agradese wa’in ba povu Japaun liu husi nia embaixada iha Timor-Leste, ida ne’e la’os apoiu primeiru maibe apoiu ba dala atus ona, signifika la’os apoiu deit ba setor edukasaun, maibe povu Japaun mos apoiu ba iha setor sira seluk no espesialmente iha edukasaun, loos duni katak ita nia kondisaun infraestrutura edukasaun nian iha kondisaun ne’ebé at barak liliu sala de aula 1000 resin ne’ebé iha kondisaun at, iha tinan hirak liu ba governu konsege resolve ona sala de aula lubuk bo’ot ida, maibe la konsege resolve kondisaun sira ne’e, ho tulun ne’ebé husi ita nia parseiru dezenvolvimentu sira liliu husi ita nia parseiru povu Japaun ita konsege hadi’a tan fasilidade balu espesial ba eskola basika filiais ida ne’e, tanba ne’e ministeriu hato’o agradese ba embaixador ho vontade tomak, nafatin loke dalan hodi apoiu ba estudante Timor oan sira atu iha fasilidade sala de aula ne’ebé di’ak ho dignu hodi bele partisipa ensinu aprendisajem di’ak liu tan” informa Helio.
Embaixador Extraordinariu no Plenipotensiriu Japaun ba Timor-Leste Kimura Tetsuya, relata hahu husi tinan 2000 to’o agora governu Japaun apoiu ona projeitu hamotuk 141 iklui ho projeitu 17 iha Munisipiu Covalima.
“Ita finansia ona projetu hamutuk 141 iha Timor-Leste husi tinan 2000 to’o ohin iha Munisipiu Covalima ami implementa ona projetu hamutuk 17 to’o ohin loron inklui konstrusaun edifisiu eskola ba ensinu baziku iha suku Labarai no konstrusaun klinika publika iha suku Debos. Edukasaun bazika importante tebes tanba Timor Leste iha populasaun juventude ne’ebé bo’ot iha responsavel ba servisu harii nasaun no dezenvolvimentu ekonomiku no sosisal nasaun ida ne’e nian iha futuru,” nia dehan.
Tan ne’e Reprezenta povu japaun Kimura husi ba Autoridade sira iha Covalima atu fo koperasaun atribui responsavelidade hodi asegura utilizasaun no manutensaun ba obra sira ne’ebé konstrui ona liu husi kontribuisaun Povu Japaun nian iha Covalima.
“Iha okaziaun ida ne’e ha’u hakarak husu ba autoridade lokal sira no ofisial sira ne’ebé iha responsabilidade ba operasaun no separasaun ba inserasaun sira ne’e atu asume responsabilidade hodi asegura utilizasaun no manutensaun ne’ebé di’ak, inklui orsamentu no alokasaun ba mestri sira, atu nune’e estudante sira bele uza ba tinan barak, ha’u mos hakarak husu ba parte hotu hotu ne’ebé involve atu fo apoiu ba espasu hirak ne’e. Ha’u hein katak edifisiu eskola ida nudar simbolu amizade entre Timor Leste no japaun” Kimura dehan.
Sekretariu Munisipal Asuntu Sosiais no Organizasaun Komunitaria, Filomeno Cardoso, lori autotidade Covalima nia naran agradese ba povu Japaun no ONG Mahon ne’ebé hetan fiar hodi konstrui eskola Harekain ne’e.
“Hakarak hato’o agradese wa’in ba ita nia embasada Japaun ho prezidente Mahon ne’ebe kolabora di’ak bele konstrui ona eskola filial EBF Harekain ne’ebe la sala ita nasaun TL presija doadores, presija ema hotu nia tulun maka hanesan ita nasaun vizino Japaun fo tulun ita halo konstrusaun ba ita nia eskola EBC Beilaku, iha EBF Harekain, ne’ebe ami nudar autoridade husi Covalima hau reprezenta PAM Covalima agradese wain tebes, ba ita bo’ot sira hotu nia tulun, maibe laos ida ne’e deit mak ita bo’ot sira presia tulun ami, iha buat seluk tan mak ami presija ita nia tulun, tanba lori povu Covalima nia naran hato’o agradese dala ida tan ba ita bo’ot sira nia tulun ne’ebe mak iha” Filomeno fo agrades.
Enkuantu konstrusaun ba Edifisiu Eskola Basiku Filial Harekain ho sala aula 4, konstrui husi ONG Mahon ne’ebé finansia husi governu Japaun ho montante dolar amerkanu rihun hitu nulu resin rua, atus sia, sia nulu resin rua ($ 72,992.00), liu husi ninia skema grand asistensia ba projetu baze no seguransa umanu (GGP).
Jornlaista : Julio Salinas
Editor : Chamot Nahac
