COVALIMA—-Xefe Seksaun Finansa Programa Mão de obra Postu Administrativu Zumalai, Benjamin da Costa, informa nia parte submete ona relatóriu implementasaun Programa Mão de obra Postu Administrativu (PMOPA), faze dahuluk no daruak nian ba Administrasaun Munisípiu Covalima (AMC) iha tinan kotuk.
“Ha’u hanoin ami submete ona relatóriu implementa PMOPA faze dahuluk no daruak nian mai iha administrasaun Munisípiu Covalima ba faze dahuluk iha fulan outubru no faze daruak submete iha fulan dezembru tinan 2022” informa Xefe Seksaun Finansa PMOPA Postu Administrativu Zumalai Benjamin da Costa, hato’o ba jornalista iha resintu AMC, Sesta (06/01).
Nia dehan durante implementa PMOPA faze dahuluk no daruak foku ba programa reparasaun estrada kiik, protesaun ba bee matan, limpeza jerál ba esgotu (baleta), manutensaun no hadia jardim postu no suku sira ne’ebé presija jardim.
Benjamin relata implementa PMOPA iha Zumalai ba faze dahuluk benefisiáriu 10,67 konsege fó servisu ba trabaldór 432 no ba faze daruak traballadór na’in-960 nune’e bele atinje meta tuir matadalan haruka.
Nia haktuir PMOPA faze dahuluk iha postu Zumalai kria grupu 21 , faze daruak kria grupu 24 ne’ebé kada grupu traballdór na’in-40 tanba grupu halo rotasaun grupu ida traballadór 20.
Entertantu total orsamentu implementa PMOPA iha postu administrativu Zumalai hamutuk faze dahuluk $ 57,260 no faze daruak mós $ 57,260 husi orsamentu ne’e loron ida selu traballadór $ 5.00 no ba supervisor loron-ida $ 7.00.
Enkuantu governu liu husi Ministériu Administrasaun Estatal (MAE) transfere orsamentu implementa programa mão de obra ba munisípiu Covalima hamutuk $ 782,102 ba iha konta bankaria munisípiu nian.(Azu)
