Covalima (RCCT) 20-05-25-Relasiona ho komemorasaun loron indenpendensia Timor Leste ba dala XXIII, iha Postu Administrativu Suai, iha ne’ebé komunidade la partisipa masimu, tanba xefe suku hetan deit alokasaun osan hamotuk dolar amerikanu atus ida ($ 100) utiliza hodi mobiliza komunidade.
Xefe Suku Debos Agustinho da Silva hatete Populasaun barak la partisipa iha komemorasaun loron istoriku 20 Maiu. Basa tinan ida ne’e kada suku simu deit osan $100, nune’e jere la to’o hodi mobiliza komunidade husi suku ida idak partisipa iha serimonia hasa’e bandeira nasional iha kampu Ladi Suai.
“Ohin loron ne’e povu barak maka triste tanba povu barak mai tuur de’it iha rai, tanba tur fatin la iha, no mos Xefe Suku rasik mos tur iha semente tanba kadeira la iha, depois orsamentu ne’ebé atu mobiliza komunidade kada suku hetan deit ho montante Dolar Amerikanu atus ida ($ 100), prontu sira fo $100 ita atu mobiliza ema barak, ha’u hanoin defisil uitoan tanba preokupasaun konaba hahan, tanba $100 labele akumula mobiliza ema barak mai partisipa iha serimonia hasa’e bandeira ne’e” informa Xefe suku Debos Agustinho da Silva ba Jornalista sira hafoin remata partisipa iha serimonia hasae bandeira nasional ba komomerasaun restaurasaun indenpendensia ba dala XXIII, iha Kampu Futebol Ladi, Suai Tersa (20/05).
Administrador Postu Administrativu (APA) Suai, Ildefonso Maria Amaral klarifika konaba ba selebrasaun loron nasional 20 de Maiu 2025, Postu Adminsitrativu Suai hetan alokasaun orsamentu ho montante dolar Amerikanu atus nen lima nulu ($ 650.00), hodi aloka fali ba suku lima ho montante kada suku lahanesan, suku balu hetan $100 no suku balu hetan $ 115.
“Alokasaun orsamentu husi Munisipiu mai iha Postu Administrativu ho montante dolar amerikanu atus nen lima nulu ($ 650.00), ami halo enkontru iha postu administrativu ho liña sektorais sira, no mos koloka ba iha kada suku, no iha suku rua maka hetan kolokasaun orsamentu ho montante $ 100, maibe Suku Beko ho Postu Administrativu rasik hetan alokasaun orsamentu ho montante dolar amerikanu atus ida sanulu resin lima ($ 115.00), maibe ba oin ami sei tau ba iha Planu Asaun Anual (PAA) tinan ida ne’e ho montante osan dolar Amerikanu rihun ida ($1000) kada Postu Administrativu liliu Postu Suai ba komemorasaun loron nasionais tolu, hanesan 20 de Maiu, 30 de Agusto no 28 de Novembru tinan ida hala’o dala ida” APA Suai relata.
Enkuantu tuir Xefe Debos Agustinho da Silva dehan, mobiliza komunidade barak partisipa iha komemorasaun loron nasional, maibe laiha osan hodi garantia konsumu ba komunidade sira, nia mos dehan Administrasaun suku la iha osan rasik atu sosa hahan ba komunidade sira wainhira partisima masimu iha komemorasaun loron nasional ne’ebé hala’o iha Munisipiu Covalima.
Jornalista : Julio Salinas
Editor : Chamot Nahac
