Covalima (RCCT) 22-04-25- Suku Beko, Arlindo Bernadinho Lemos, rekuñese iha tinan 2024 to’o 2025, governu da sia halo dezenvolvimentu liu husi implementa projeitu lubuk ida iha ninia suku.
Projetu ne’ebé implementa iha Suku Beko maka hanesan projetu konstrusaun baleta, dada liña eletrisidade, konstrusaun moru protesaun iha mota Lo’omea, merkadu Beko no mos programa R4D nian konaba estrada rural.
“Hahu husi tinan 2024 to’o agora projetu hirak ne’ebé tama mai iha Suku Beko maka hanesan konstrusaun ba baleta iha Aldeia Aidantuik ne’e hala’o husi PNDS, konstrusaun ida mos Konaba moru protesaun iha Mota Lo’omea, Aldeia Maukola ne’e hala’o husi Ministeriu Obras Publika, Ida fali konaba merkadu ne’e hala’o husi PDIM, tuir fali dada liña eletrisidade husi Aldeia Bibel, Gala, Teda, Tobur depois husi Aldeia Holbolu ba Dilohilin , depois husi Beko Sentru ba iha Aldeia Halik, Ida seluk fali mos programa R4D nian kona ba estrada rural pakote nian ne’e liga husi Aldeia Bibel nian karik ba to’o iha Tobur, depois husi Beko Sentru ba iha Aldeia Halik ne’e projetu R4D nian hotu Konaba pakote estrada rural ne’e, projetu sira ne’ebé la’o iha Suku Beko Nia laran ne’e balu la’o iha 2024 no balu mos hahu hala’o lansamentu iha 2025 ne’ebé ninia prosesu agora La’o hela” informa Xefe Suku Beko Arlindo Bernadinho Lemos ba RCCT iha nia Knar fatin Sede Suku Beko.
Xefe Suku Beko afirma projetu ne’ebé implementa iha Suku Beko ne’e balu atinji ona pursentu 90 ba leten, balu foin atinji pursentu 25 maibe konstrusaun kontinua la’o ativu.
“Ba iha projetu konstrusaun baleta iha Aldeia Aidantuik, husi PNDS ne’e kuaze pursentu 90 resin ona, tanba nia atu besik remata, ba iha projetu eletrisidade ba iha Aldeia Gala nian tuir informasaun ne’ebé sira hato’o ne’e tama ona ba pursentu 27, ida fali konaba moru protesaun Mota Lo’omea iha Aldeia Maukola ida ne’e ita la hatene atinje pursentu hira ona tanba ema la informa mai iha suku, depois ba iha projetu R4D nian sira foin hala’o tanba ne’e la sala foin tama ba pursentu 15-20 hanesan ne’e, konstrusaun la’o ho di’ak agora sira servisu hela ne’ebé ninia pursentu ne’e to’o ona hira ita la hatene, maibe servisu lao hela” Xefe Suku Beko informa.
Enkuantu tuir kontratu ne’ebé iha, liliu ba projetu eletrisidade no projetu R4D nian konaba estrada rural ne’e nia konstrusaun sei remata iha tinan ida ne’e, no projetu eletrisidade balu sei remata iha fulan Maiu no balu sei remata iha fulan Juñu ho Jullu no balu bele to’o fulan setembru no dezembru tinan ne’e.
Jornalista : Julio Salinas
Editor : Chamot Nahac
