Covalima (RCCT) 23-04-25-Relasiona ho akontesimentu ema deskoñesidu dada tali korta iha Auto Estrada iha Area Suk Beko, Foin lalain iha loron 17 Fulan Abril Liu ba, maka Xefe Suku Beko, Arlindo Bernadinho Lemos, tau ona planu hodi orgazida komunidade sira atu halo limpeza iha Auto Estrada.

Xefe Suku Beko dehan, planu tesi ai hun ne’ebé moris iha Auto Estrada iha area suku beko, hodi bele fo seguru ba publiku wainhira halo viazen uza motorizada no kareta liu husi dalan bo’ot ne’e.

“Ami garante katak situasaun ne’e sei la’o ho di’ak, tanba ema ne’ebé hela besik auto estrada ne’e parte Beko Sentru, Aldeia Aidantuik, no Aldeia Haemano, sira ne’e maka hela besik Auto Estrada, ne’ebé karik komunidade Suku Beko ka ema ruma husi Beko maka halo ida ne’e karik?. Parese la’os ema seluk, balu halo to’os iha ne’eba dala ruma ultra pasa Auto Estrada ba to’os no ema balu husi fatin seluk mos bele mai halo buat hirak ne’e ita la hatene, tanba ne’e ha’u hakarak informa ba publiku katak agora daudaun situasaun normal no ba oin ami mos sei iha planu ida para tesi tiha ai horis sira ne’ebé moris iha Auto Estrada para ema halo movimentasaun tun sa’e karik labele ba deskansa iha ne’eba hodi hanoin at ba ema seluk atu liu husi auto estrada” Xefe Suku Beko Arlindo Bernadinho Lemos, informa ba RCCT iha nia k’nar fatin Sede Suku Beko Tersa (22/04).

Liderasa Suku ne’e mos dehan sei bandu komunidade sira labele fa’an sasan besik Auto Estrada, hodi hamenus mosu deskunfia ba Komunidade Beko wainhira akontese tan atetude imoral sira hanesan foin dadaun.

“Komunidade barak maka fa’an sira nia produtu lokal hanesan nuú, kuandu tempu has fuan sira lori ba fa’an iha ne’eba. Ami sei hatete ba sira katak labele fa’an sasan iha ne’eba, se lae maka buat ruma akontese, ema deskonfia dehan ita maka halo buat ida ne’e, Auto Estrada ne’e ema hotu nian, ema hotu liu iha ne’eba, ne’ebé buat ida deskonfia akontese iha suku ida ne’e normal ne’e ami simu, maibe ita la hatene Autor ba buat ida ne’e se ida ?, ami mos la deskonfia ema husi Suku seluk maka mai,” Xefe Suku Beko, dehan.

Enkuantu Planu halo limpeza no bandu komunidade labele fa’an produtu lokal iha dalan ninin (Auto Estrada)  atu hodi evita hahalok at sira hanesan ne’ebé foin lalais akontese ema deskoñesidu dada tali korta iha Auto Estrada hodi hafoer Aldeia Aidantuik, Suku Beko nia naran.

Jornalista : Julio Salinas

Editor       : Chamot Nahac