Covalima (RCCT) 30-11-23–Luzina Sonya Cardoso Orgullu tanba hetan konfiasa sai Xefe Joven hodi lidera juventude sira iha Suku Belekasa. Tanba ne’e Luzina dehan durante mandatu tinan hitu sei halibur joven feto no mane iha suku laran hodi kontribui ba Paz no trakuilidade.

Luzina dehan lia hafoin remata simu pose iha Salaun Antigo Postu Administrativu Maukatar tersa foin lalais.

“Ha’u nudar feto sente orgulhu tebes tanba sai ona lideransa iha Suku Belekasak hanesan xefe juventude iha hau nia mandatu tinan 7 nia laran hau prontu atu halibur hau nia juventude sira tantu feto no mane atu nune’e labele hamosu problema iha hau nia suku laran, hau nudar feto foin sae ida prontu atu lidera” informa Xefe Juventude Belekasak, Luizinha Sonia Cardoso.

Iha fatin hanesan Senita Gusmão konfesa katak ho konfiansa ne’ebe fo ba nia, nudar feto ida nia mos prontu ona atu lidera nia maluk joven sira iha suku matai liu liu sei orienta Juven feto no mane atu hakrimi krim hodi hari paz iha suku matai.

“Ha’u nudar feto ida prontu atu lidera tanba komunidade tomak iha Suku Matai fo fiar mai hau oinsa atu bele lidera maluk foinsae sira iha Suku Matai nia laran hau sei halibur sira hotu oinsa atu bele hakribi hahalok at sira ne’ebe durante ne’e akontese, no mos hau sei halibur joven feto no mane hotu ne’ebe involve an grupu arte marsiais no arte ritual atu nune’e sira bele kria amizade, pas no dame iha Suku Matai laran, hau mos sei la servisu mesak maibe hau sei involve hotu komunidade, lideransa komunitaria inklui lia nain sira oinsa atu tau atensaun ba juventude sira iha suku Matai nia laran tomak” Senita Gusmão dehan.

Entretantu Iha Postu Administrativu Maukatar Kompostu husi Suku hat Aldeia rua nulu resin nune’e iha loron 28 fulan novembru ne’e, governu fo ona pose ba membru konsellu suku hotu iha teritorio nasional, partikularmente iha munispiu Covalima Kompostu husi Xefe Aldeai na’in 148 no delegadu no delegada sira no mos Xefe Joven, Inklui Xefe Suku 30 ne’ebe hola parte iha postu administrativu 7 iha Covalima.

Jornalista : Moichun/Julio Salinas

Editor   : Chamot Nahac