Covalima (RCCT) 28-03-25-Hahu iha Loron 26 to’o 29 Fulan Marsu tinan ne’e, Prezidente Republika Demokratika Timor Leste, Jose Manuel Ramos Horta, hala’o vizita iha Munisipiu Covalima hodi halo asau karidade ba Familia k’bit naton no familia ho kondisaun espesial sira hamotuk 850 husi Postu Administrativu hitu iha Munisipiu Covalim.
Tanba ne’e Autoridad Munisipiu Covalima hamotuk ho Gabinete Prezidensial Realiza atividade desportu tradisional tolu hanesan Dada Tali, Kuda Kalera no Futu Manu hodi Anima Povu Covalima iha Ambitu Vizita Xefe Estadu Timor Leste Ramos Horta iha Rai Ketan Covalma.
Iha Eventu Jogu Tradiosional ne’e Povu Covalima partisipa ho antisiasmu no asiste iha ativiade kuda kalera no dada tali. Tanba ne’e Xefe Estadu Timor Leste promote ba povu Covalima katak, sei ko’alia ho govenu, atu realiza atividade desportu tradisinal kuda halai taru (Kuda Kalere), manu futu no dada tali iha Covalima, kada tinan realiza dala rua.
Tuir Prezidente Republika, atividade desportu tradisional tolu ne’e hala’o kedas ona iha husi abo sira nia tempu hodi husik hela to’o ohin loron, jerasaun foun sira kontinua bele banati tuir.
“Prezidente Republika fo apoiu, governu mos, ita hare tok ba oin ha’u hanoin sei ko’alia ho governu ho Ministeriu Turismu para tinan-tinan hala’o atividade refere dala rua, la’os deit ba atividade halai kuda maibe mos halo futu manu, ne’e sai di’ak liu tan, ne’e mos halo parte ba kultura, sei hadi’a liu tan fatin ida ne’e no fatin ida ne’eba, futu manu nian sei sai bo’ot liu tan, ne’e hanesan primeiru ves prezidente halo iha Covalima” Prezidente Republika Jose Manuel Ramos Horta, deklara ba povu hafoin ensera atividade kuda halai taru, dada tali no manu futu iha Suku Suai-Loro, Postu Administrativu Suai, Munisipiu Covalima, Sesta (28/03).
Prezidente Republika kompromete ba povu Covalima katak ba futuru sei halo di’ak liu tan para konvida maluk sira husi nasaun vixinho hanesan Indonezia no Australia.
“Kuandu halo fali iha fulan Augusto, konforme, depois sei hare fulan ne’ebe di’ak liu, sei halo di’ak liu tan, sempre konvida viziñu sira husi Nusa Tenggara Timur mai, Sumba sira mos bele lori sira nia kuda mai, Jakarta mos bele lori kuda mai, Australia ita sei hare, maibe hahu halo esforsu para loron seluk halo dala ida tan sei di’ak liu tan, turista lubuk ida husi NTT sei mai, husi Australia mos sei mai, Dili mos sei mai. Ema hotu kontente tanba sira sira hare iha televizaun no media sosial ema barak los, rihun ba rihun,” informa Prezidente Republika.
Durante Kompetisaun desportu tradisional Kuda kalera ha Covalima, partisipa mos husi kuda sira husi Malaka NTT nune’e kopetisaun ne’e fahe ba klase internasional, Lokal, no Klase B,C no D.
Nune’e iha Kompetisaun Kuda klase klasse B, sai primeiru lugar Kuda Hosana Dewa husi Kupang, Indonezia manan trófeu no osan $ 700.00. Segundu lugar kuda Amigo Fatumea husi Fatumea Covalima Timor-Leste ho valor osan $ 450.00. No terseiru lugar Country Boy husi Kamenasa, Covalima Timor-Leste, hetan $ 350.00.
Ba kuda klase lokal, primeiru lugar kuda Anin Salu Mata husi Oekusi Timor-Leste hetan trófeu no osan ho valor $ 700.00. Segundu lugar Kuda Antonio husi Oekusi Timor-Leste hetan valor orsamentu $ 450.00. No terseiru lugar kuda karasas husi Bora Oan Timor-Leste, hetan osan $ 350.00.
Kuda klasse D sai primeiru lugar kuda Angel husi Kefa, Indonezia hetan trófeu no osan ho $ 700.00. Segundu lugar kuda Forsa Milan husi Malaka, Indonezia hetan valor osan $ 450.00. No terseiru lugar kuda Babuta husi Suai-Loro, Timor Leste hetan osan ho valor $ 350.00.
Enkuantu iha Kopetisaun Desportu tradisionais dada tali ho modalidade feto no mane partisipa husi Postu Administrativu hitu, Sai Manan na’in dahuluk ba mod alidade Feto husi Postu Suai ne’ebé hetan premiu orsan ho valor $ 1000.00, Manan na’in daruak dada tali feto husi Zumalai hetan valor $ 750.00, Postu Tilomar tur iha pozisaun datoluk manan osan $ 500.00, Kuartu Lugar husi Fatululik, hetan valor osan $ 400.00, Maukatar sai hanesan manan na’in Dalima hetan $ 300.00, Postu Fatumea $ 200.00 no Postu Fohorem nudar manan na’in ikus liu hodi hetan valor osan $ 150.00.
Nune’e mos iha Kompetisaun dada tali ho modalidade mane Postu Suai nafatin tur iha manan dahuluk hetan premiu orsan ho valor $ 1000.00, Manan na’in daruak husi Zumalai hetan valor $ 750.00, Postu Tilomar nafatin tur iha pozisaun datoluk manan osan $ 500.00, Kuartu Lugar husi Fatululik, hetan valor osan $ 400.00, Maukatar sai hanesan manan na’in dalima hetan $ 300.00, Postu Fatumea $ 200.00 no Postu Fohorem nafatin hetan kadeira manan na’in iha fileira ikus liu hodi mana valor osan $ 150.00.
Jornalista : Julio Salinas
Editor : Chamot Nahac
