Covalima (RCCT) 16-02-24-Xefe Aldeia Oraniza Komunidade Natardik, Suku Dato Tolu, Postu Administrativu Fohorem, Sesta (16/02) hala’o servisu voluntariu hodi taka estrada kuak nune’e bele fasilita movimentu komunidade uza transporte husi Natardik ba Postu Administrativu Suai.

Xefe Aldeia Natardik, Mario Perirra hatete, disidi organiza komunidade sira servisu voluntariamente taka estrada kuak, basa durante difikulta komunidade sira atu lori produtu lokal asesu ba merkadu iha Fohorem no mos Merkaduria iha kapital munisipiu Covalima.

“Ha’u nudar Xefe Aldeia organiza komunidade hodi halo servisu voluntariu deit laiha fundus ruma maka apoiu husi governu, objetivu bele servisu oinsa bele ajuda komunidade lori sira nia produtu lokal asesu ba merkadu ho di’ak, tanba rai Suku Dato Tolu iha potensialidade ba iha produtu lokal” informa Xefe Aldeia Natardik, Mario Pereirra ba jornalista sira iha Natardik Sesta (16/02) foin lalais ne’e.

Reprezentante Juventude Natardik Edmundo dos Santos Pereirra, haktuir inisiativa taka estrada kuak ne’e para iha tempu udan labele difikulta movimentasaun komunidade uza transporte ne’ebe balo viaze husi Suku dato rua ba fohorem no Suai.

“Sente kontente bainhira ami nia xefe aldeia organiza komunidade hodi hala’o servisu voluntariu ida ne’e, ami nudar komunidade liliu husi parte juventude ami apoiu malu, suporta malu hodi hala’o servisu voluntariu ida ne’e, bainhira tempu udan ruma dalan ne’e ami asesu ne’e defisil tebes, ne’ebé ho tempu ida ne’e ami ami hakarak organiza malu atu hadi’a ami nia dalan ida ne’e, atu nune’e ami bele halo movimentu husi suku ida ne’e ba Suai bele lao ho di’ak, iha parte seluk mos hanesan nudar joven kontente ho dalan ne’ebé durante ne’e ami la asesu maibe ho esforsu tomak tinan ida ne’e ami asesu duni, ne’e ami husi juventude agradese bo’ot nai ulun sira ne’ebe fo apoiu ona mai ami, tan ami juventude sei la hein ba iha governu dalan ne’ebe at hanesan kuak iha tempu udan ruma hodi difikulta ami nia movimentu ladi’ak ami tenke organiza malu tenke hadi’a para oinsa ami bele lori ami nia produtu lokal asesu ba merkadu ho di’ak. Ami iha planu ona ho xefe aldeia kada sesta tenke hala’o servisu voluntariu hanesan ne’e ba oin nafatin” nia dehan.

Entertantu servisu voluntariu ida ne’e inisiativa husi Xefe Aldeia Natardik taka estrada kuak atu fasilita momvimentu komunidade lori produtu lokal asesu ba merkadu no mos bele fasilita komunidade sira asesu lalais ba fasilidade Saude iha fohoreme no hafasil ambulansia atu transfere pasiente husi Natardik, Suku Datu Rua mai iha hospital Suai. Engkuantu Aldeia Natardik, Suku Dato Tolu, Postu Administrativu Fohorem kompostu husi Xefe Familia hamutuk 206, total populasaun hamutuk 771.

Jornalista : Julio Salinas

Editor : Chamot Nahac