Tinan ne’e konstrusaun Uma Naroman ba Povu (UNP) iha Aldeia Busakukun hamotuk 3, nune’e wainhira halo observasaun Xefe Aldeia Januario idetfika uma rua mak hetan problema, badaen fui kuluna la ho kualidade, ida seluk konstrusaun besik ona remata maibe depois foru hotu plafon uma nian maibe udan ben sei sai.
“Iha semana kotuk ha’u rasik sobu uma naroman ba povu ida ida iha ne’e tanba hare laiha kualidade, badaen sira halo cor ba iha plaka la uza besi, entaun iha ne’eba ha’u hamutuk ho Ekipa Jestaun Suku (EJS) ha’u direita maka baku rahun hamonu ida ne’e depois ha’u konfirma ho sira tekniku postu atu oinsa maka resolve fila fali ba iha problema ne’ebé maka iha, tanba husi ha’u nia hare katak laiha kualidade tanba cor plaka ne’e la tau besi, uma ida seluk konstrusaun remata ona pursentu sianulu resin lima maka depois sira tau tiha foru ka plafon udan ben sei sai, ida ne’e mos hau kestiona ba iha postu ne’ebé sira sei resolve iha tempu badak, depois semana kotuk ida baku rahun ona iha semana ida nia laran ne’e sira sei hadi’a fila fali.” informa Xefe Aldeia Busakukun, Januario Amaral do Carmo ba RCCT iha Busakukun.
Januario kontinua “ha’u agradese ba programa ne’e tanba programa ne’ebe lao di’ak antes ne’e, maibe tuir nia mata dalan dehan kontratu ne’e fulan-4, maibe ha’u la hatene problema ne’e to’o iha ne’ebe, probelema ne’e tanba sa ha’u hanesan xefe aldeia foun foin eleitu, foin hala’o ha’u nia servisu tama fula id aka rua, maibe ha’u nia observasaun durante ne’e primeiru falla husi fornesedor kompania ne’ebe manan tenderizasaun ka hatama sasan non fabric no fabrikanu ne’e tarde” nia hakotuk.
Engkuantu, Diretór PNDS Munisipiu Covalima Pedro de Araujo Gomes, apresia ba servisu ne’ebé Xefe Aldeia Busakukun halo hodi kontrolu masimu ba konstrusaun UNP nune’e garantia kualidade.
“Ha’u agradese ba xefe aldeia Busakukun tanba bele kontrola ona ho masimu, ha’u hanoin ligadu ba iha kualidade ba projetu hotu iha iha PNDS ne’e la’os ekipa Jestaun suku ka la’os kolega fasilitador postu administrativu, la’os mos ekipa munisipiu mesak maka atu kontrola konaba kualidade maibe ema hotu iha aldeia ka suku laran bele kontrola garante ninia kualidade, ne’e ema hotu bele monitoring” Diretór PNDS Covalima salienta.
Ne’ebé ligadu ba informasaun husi xefe aldeia konaba uma UNP ida la uza besi beton wainhira fiu palaka ne’e Diretór PNDS dehan badaen sira uja duni besi maibe falla teknika tanba besi la silu halo kleuk hodi kaik ba kuluna, maibe dadaun ne’e badaen sira komesa tutan ona besi hodi hadia fila fali.
“Ligadu ho informasaun refere ha’u liga ba kolega tekniku postu katak sira uza duni besi beton so ke la uza kait ka besi nia rohan ne’e la silu halo kleuk hodi kait ba malu ho besi kluna, maibe agora badaen sira komesa tutan besi ne’e hodi silu halo kleuk kait ba iha kluna ne’e, dala ida tan agradese ba xefe aldeia atu kontinua tau matan ba obra hotu-hotu PNDS nian iha ita bo’ot nia aldeia rasik, tantu nia bele UNP bele mos PNDS Regular kualker atividades saida maka PNDS nian kontinua kontrola,” Tenik nia.
Diretór PNDS Covalima mos esplika konaba fornesedor hatama sasan tarde ba implementasaun UNP iha Suku Debos, Aldeia Busakukun, ne’e desizaun xefe aldeia tanba iha mata dalan PNDS nian hakerek, kuandu kompaña fornese material tarde liu husi loron 7 konsellu suku sira bele halo enkontru ida bele hapara kompaña ne’e hodi buka fali seluk ou EJS suku hamutuk ho konsellu suku bele sosa direita iha loja ne’ebé maka iha ita nia munisipiu,
Reportazen RCCT
Editor : Chamot Nahac
